هند عبد الغنى تكتب : البر بحب و البر لواجب
نتجوز ونخلف وتربى ونكبر وبعدين نفضل ننشد ونكرر إن دة أكبر إنجاز عملناه في حياتنا.. ولما نيجى نتكلم عن اولادنا نقول وتأكد ان تربيتهم احسن تربية وتعبت عليهم وفيهم ووووو ….
مش بس كدة دة كتير مننا ناس منانة اب وام يفضلوا طول حياتهم ميعيشن اولادهم فى قهر وذل وتسمع بقى من الاقوال المأثورة..
انا ضيعت عمرى وشبابى عليكم …
انا لو كنت انتبهت لنفسى وسيبتكم كنتم ضيعتم …
انتوا المفروض تفضلوا تكافئونى على عمرى اللى راح
انا وانا وانا ……
ايه بقى هو احنا بنخلف نعذب ولادنا ليه
ومين قال اننا مش مقصرين حتى لو بدون قصد ..محدش فينا ملاك
هو احنا ليه بنجبرهم على البر
مانسيبهم يبرونا بحب بدل البر الجاف اللى قايم على رد دين وواجب وخلاص
يعنى ايه اخلف واكبر واحس انى عملت انجاز خارق
دة دورى ومهمتى ف الحياة وربنا اللى بيكافئ…واللى شايف انه لما يهتم ويصرف ويريى دخل التاريخ
نقوله لو سمحت محدش طلب من حضرتك تخلف اصلا …الدنيا مكنتش حتقف يعنى على اولاد سعادتك
لكن اللى لازم تنتبه ليه حقيقى دورك قمت بيه ازاى هل على اكمل وجه !!!؟؟
هل لما ولادك كانوا فى أزمة نفسية دوروا عليك انت ولا كان لك بديل !!
هل كنت الخيار الأول ف حياتهم
هل كنت مصدر امنهم وامانهم
هل بالفعل كان عندهم اكتفاء عاطفى منك ومحاولوش يدوروا عليه بره
هل كنت الحضن والاحتواء وشاركتهم فرحهم وزعلهم!!!
دور حضرتك مش انك تتحف الدنيا بخلفة ولد ولابنت …علشان الدنيا حوالينا مليانة شباب وبنات مسخ ملهمش طعم ولا فكر ولا اى حاجة
دور حضرتك كراعي تراعى ف صمت وبلاش يفط الانجاز دى كأننا داخلين انتخابات
سيب الدنيا حواليك هى اللى تحكم على تربيتك واللى بتسميه انجاز
واعرف ان كله بتوفيق ربك مش بس شطارتك…
و متقلقش ربك قال
” هل جزاء الإحسان إلا الإحسان ”
انت احسنت لوالديك وجزائك من جنس عملك ف ترزق باحسان ابنائك لك ..
“لن تنالوا البر حتى تنفقوا مما تحبون”
يعنى مش مجرد إنفاق بس دة أهم حاجة الإنفاق بالحب والحنية …
أحسنوا لأولادكم وازرعوا بذور البر حبا ليس جبرا
إنشرها …البر لحب وبحب خير من البر بالكره والجبر.
