صباح للنور
بقلم / طارق الشاعر
هتبقي لامتي متضايق
وقلبك م العياط مفطور
جبرت بخاطر الخاينين
ونمت بخاطرك المكسور
زرعت في ارض اعداءك
وحسادك وأرضك بور
قصادك سور مبتعديش
وعمرك قطر ع القضبان مبيهديش
مقضي العمر في الشباك
بتتفرج وقافل الشيش
محلك سر
لاعمرك كنت مرة يمين
ولا عمرك حدفت شمال
بتكتتم غنوتك جواك
وعامل للهموم موال
قفلت عليك بميت ترباس
بعدت بعيد هجرت الناس
حزين علي طول بدون اسباب
وتدفن وحدتك في كتاب
حاولت تقوم
ورجلك رافضه مش شيلاك
سكنت في خانة الشياطين
وقلبك لسه قلب ملاك
ملاك الهم ياصغير
وشعرك كله شاب بدري
وزارت وشك التجاعيد
وحب العمر ساب بدري
تصون الحب وتحارب
وتحمي دهور تصون خاطر
تلف وينكشف ظهرك
متلقاش ليك ولا ساتر
يجولك وقت ما يحسوا بخنقة وضيق
وساعة خنقتك تفضي عليك الدنيا دي وتضيق
بتربط فرحتك بيهم
وتضحك لما يرتاحوا
وكام مرة سابوك وحدك
وسرك ياما بيه باحوا
بتفتح للجميع بابك كأنك دكه في الشارع
يعدوا عليك ويرتاحوا
وتطمن لهم ديما
فتلقاهم اوام راحوا
كتاب مفتوح
حنين مفضوح
طريق ديما متاح للكل
صباحك فل
نصيحة العمر ده قصير
متتغير ؟
وخلي الباب موارب بس
ودخل كل من بيك حس
وودع كل من باعك
وكل سبب لاوجاعك
وكل جبان كتملك حس
