العروسة خبرة ولا خام
بقلم / هند عبد الغنى
قولت أروح أقضى يوم فى النادى فى أجواء شتوية بحب اعيشها زى الاطفال واخترت ترابيزة اخد فيها قهوتى السادة وجانبى ترابيزة قريبة منى قاعدين عليها سيدات فضليات.. لكن للاسف حديثهم كان صوته عالى والحقيقة حديثهم عن فرح احداهن … وفاجأة سألتها صديقتها بعد المباركة وسألتها لها سؤال انا اتصدمت منه ….
هى العروسة بتاعة ابنك خبرة بقى ولا خام !!!؟؟؟
وقعدت ثوانى استوعب الجملة واسأل نفسى هى قصدها ايه !؟ وهل السؤال اصلاً له معانى كتير ! وياترى أم العريس حتجاوب عليها حتقول ايه !!
سبت القهوة بتاعتى اتجمدت شبه احساسى اللى اتجمد من صدمة السؤال … وكان عندى فضول رهيب اسمع باقى الحديث لانى حسيت انى فقيرة معلومات ….
ام العريس بمنتهى الثقة ردت عليها …وقالت / لا ياحبيبتى دى بنت خام لا لفت ولا راحت ولا جت يادوب خلصت تعليمها ومن بيت باباها لبيت ابنى ان شاء الله.. وكملت حوارها اللى قفلت بيه السؤال وقالت / اخس عليكى احنا برده سكتنا واحدة خبرة !!!…
وبعد شوية مشوا وسابونى فى حيرة…
وقعدت اقول لنفسى وهى الخبرة مالها مهى عادى والله تبقى خبرة حياتية بتعرف تطبخ وتعرف يعنى ايه بيت واسرة ومسؤلية زوج ، خبرة فى ادارة شئؤون الاسرة ومستعدة لمسؤلية انها تكون أم فى المستقبل القريب متفهمة لحقوق الزوج وازاى هى استعدت لاسعاده واسعاد نفسها ….
هو احنا ليه اختزلنا ( الخبرة ) فى العلاقة الزوجية وبس.. احنا محتاجين بالفعل للخبرة يعنى تكون ذكية وشاطرة وبتعرف تتصرف ويُعتمد عليها …
تكون خبرة فى دعم استقرار الاسرة …
وقعدت افكر هى البنت الخام يعنى هى اللى ملهاش تجارب ولا غيره دى مقياس لنجاح العلاقة !! طب اولاً مبقاش فيه كتير من النموذج دة بعد عصر الانفتاح اللى بقينا فيه
ثانياً / كتير من الشباب لما بيرتبط بواحدة فاقدة خبرات الحياة بيبقى مستاء ومفتقد سند يشيل معاه لانه محتاج واحدة تقدر تدير مهمات الحياة الاسرية والزوجية بلباقة وهدوء وفى الاخر بيبقى هو اللى بيدور على اللى تملك الخبرة حتى لو كانت خام يعنى ( تربية بيتى ) مفيهاش اى تعارض لو بس اخدناها من منظور عام وبطلنا التخصص …ولا ايه .
