َمحمد السلاب.. يجب الاهتمام بدورة الألعاب البارلمبية لذوى الاحتياجات الخاصة مثل اهتمامنا بكورة القدم
كتب / عمرو حسن
بدأت دورة الألعاب البارلمبية لذوى الاحتياجات الخاصة في طوكيو ٢٠٢٠ ، اللي مهتم بالرياضة أكيد عارف إن حضور مصر في المنافسات الرياضية لذوي الاحتياجات الخاصة قوي ومؤثر ودايما بنراهن عليه …
يعني أحنا عندنا حوالي ١٥٠ ميدالية من مجموع مشاركاتنا في دورات الألعاب البارلمبية منهم حوالي ٥٠ ميدالية ذهب.
الشيء اللي حقيقي أنا مهتم بيه إن الناس تعرف مين الأبطال دول وإيه الألعاب اللي هيشاركوا فيها ويتابعوهم ويشجعوهم زي مابيشجعوا لعيبة كورة القدم أو أي لعبة تانية ، لأنهم يستحقوا كده واكتر من كده كمان ، وعشان تبقى عارف وتتابع زى ما أنا هتابع، أحنا هنشارك في ٨ ألعاب وهي رفع الأثقال، ألعاب القوى، السباحة، تنس الطاولة، كرة الطائرة جلوس، التايكوندو، ريشة طائرة، كرة الهدف للمكفوفين … وعندنا ٤٩ بطل وبطلة هيمثلونا في الألعاب دى في السطور الجاية هتكلم عن مجموعة منهم :
الأسطورة إبراهيم حمدتو اللاعب الوحيد في العالم اللى بيلعب تنس طاولة بفمه …
آية الله أيمن أول سباحة مصرية تحرز ميداليتين في البطولات البارلمبية وسنها لسه ١٧ سنة …
شريف عثمان بطل رفع الأثقال صاحب ٣ ميداليات ذهبية في بارلمبياد بكين ولندن وريو واللي حطم الرقم القياسي في بطولة العالم ٤ مرات …
فاطمة عمر بطلة رفع الأثقال صاحبة ميداليات بارلمبية بينهم ٤ ميداليات ذهبية …
أمانى الدسوقي بطلة رفع الأثقال وصاحبة الميدالية البرونزية في أولمبياد ريو …
منتخب مصر للكرة الطائرة جلوس صاحب الميدالية البرونزية في أولمبياد ريو والمرشح بقوة باذن الله إنه يجبلنا الميدالية الذهبية …
دول بعض من النماذج اللي شرفتنا واللي بيشرفونا كل يوم بعزيمة وباجتهاد وببطولة ،،
نماذج بتثبت إن الإرادة هي المحرك الحقيقي للنجاح في الحياة
