هند عبد الغني تكتب : ربتني أمي
التربية عاملة زى الميراث بتنتقل من شخص قدوة مسؤل للشخص المسؤل عنه ….
بناخد جزء جينات وجزء تعليم وثقافة وجزء كبيير تربية وكل ام غالبا بتكون حريصة ازاى تربى بنت تكون ست تفتح بيت ، بنت مهما حاولت الام تعليمها وانها توصلها لدرجة عالية من الثقافة الا انها دايما عندها جزء كبير من وقتها بتعده لان تكون البنت ست بيت ناجحة وزوجة نافعة وام راعية ….
وبدات تختلف التربية بسبب اختلاف الزمن والتكنولوجيا الا انى شايفة معظم الامهات اللى اتربوا وربوا بالفطرة هن الاكثر نجاح …
ربتني امى مثلا على قيم تبان بسيطة لكنها اصيلة
* متبصيش لحياة حد وركزى مع نفسك وبس
* اتعلمى تكونى راضية بس وانتى بتطمحى للافضل
* بلاش روح الانتقام وسامحى حتكونى افضل
* اتعلمى تعتمدى على الله ثم نفسك
* لما تقبلى انسان تقبليه بكل صفاته مميزات وعيوب احنا مش ملايكة
* جسى قلبك وانتى بتشوفى وبتسمعى للناس شوفى قلبك حيدلك على ايه وصدقيه
* الفلوس مهمة علشان نعيش بس مبتسندش لوحدها من غير ناس تحبك
* اوعى والكبر والغرور فمن تواضع لله رفعه
* متستنيش سعادة من انسان زيك السعادة فى رضا ربك عليكى ورضاكى عن نفسك الاول
*الستر اكبر نعمة ممكن بنت او ست تحظى بيها
*متطلبيش من حد شئ فوق طاقته
* الصبر ثم الصبر ثم الصبر على كل امور الحياة
خليكى قنوعة ومتطمعيش علشان الطمع يقل ماجمع
اتعلمت ياامى بس الناس والدنيا دى مبقاش كتير يعرف اللى ربتينى عليه
الدنيا اتقلبت واختل توازنها والناس بقى همها الدنيا وبس ونسينا اننا عايشن حياة ربنا كتبهالنا من قبل ما نيجى
واننا مش حناخد الا اللى ربنا كاتبهولنا
