هند عبد الغني تكتب: لا تذم ولا تشكر غير بعد سنة و٦ أشهر

مين الست اللى قاعدة اسفة ( تجعر ) وتهين المرأة المتزوجة ربة المنزل وتقول عليها جارية
انتى ازاى جاتلك الجرأة تقولى على الست اللى قاعدة لبيتها بارادتها تقولى عليها جارية ايتها الجارية …

وازاى الست المحامية بتاعة الست مش ملزمة اللى مطلوق سراحها علينا طالعة بتطلب بالغاء الازهر الشريف
يا ست دة احنا لما حد يحب يتكلم على مصر يقولك بلد الازهر الشريف انتى ايه الجرأة اللى انتى فيها دى وبستشهدى ببلد لا شبهنا ولا حضارتنا ولا تربيتنا فوقى بقى .

انتوا بجد ستات مصريات ازاى والله خراب البيوت انتم سبب كبير فيه بسبب التحيز المرضى للست وتحويل القانون لحلبة مصارعة بين الراجل والست واصلا الوضع بيسوء بسبب عوامل كتير اهمها الوضع الاقتصادى ….

ومعلش عندى استفسار هو الحاج عبد الغفور البرعى أتدخل فى كتابة القانون اصله كان له حكمة بتقول لا تذم ولا تشكر الا بعد سنة و٦ أشهر فاحنا مستعجلين و خليناها ٦ أشهر بس مستعجلين اوى على الخراب …

يعنى يامؤمنين شاب ابوه وأمه يقعدوا يربوه سنين ويتعبوا عليه علشان تيجى تقيميه ف ٦ شهور والآخر ممكن تقوله اسفة مش مرتاحة معاك ..دة اسمه ايه هو كان بيقدم على التدريب فى شركة ويا يتقبل او لا ما احنا عندنا قاعدة دينية وحديث نبوى ” من ترضون دينه وخلقه فزوجوه ” دة من البداية ..

والقانون اللى الكل دخل طحن ف بعضه
هو الزوج من حقه يمنع زوجته من العمل ولا لاء ….
انا شايفة انه من البداية يتزوج من بنت غير عاملة اذا حب ونريح دماغنا من تقديم بند حيزود الصراع زيادة …

احنا قاعدين هنا نكتب ونشجب ونرفض ونؤيد فى القوانين لكن اللى المفروض يحصل ويتفعل بجد ان القوانين تخدم استقرار الاسرة وأهمها الاطفال …

كدة احنا حولنا الزوجين ل فريقين ضد بعض وبالبلدى كدة المشرحة مش ناقصة …
اما فكرة الشروط ف عقد الزواج فالموضوع قديم وجائز اذا وافق الطرفين ..
الحقيقة الاكتر من عيب وعوار اى قانون عيوب النفس البشرية
اتنين يبداوا بالند مش بالمودة
بالظلم مش بالعدل
بالتربص مش بالتغافل .

المشكلة الأساسية هى استخدام القوانين بشكل يحقق الانتقام مش العدل خالص
وف وسط الخناقة دى كلها الاطفال بتدفع التمن …
والكل بيلعب دور الضحية ويهلل هو القانون مع مين …!!!

محتاجين قوانين تصحى ضمير وتحد من حالة الحرب الدايرة بين الزوجين
محتاجين نعلم الناس تبدأ حياتها بالمودة والرحمة اللى ربنا أمرنا بيهم
غير كدة والله لو عملنا قانون لكل اسرة ما حتستقيم الامور.

إحساس البركة اللي مبقاش موجود في أي حاجة زي زمان اللي إنت حاسس بيه ، لا حاسس ببركة في رزق ولا حاسس ببركة في صحة ولا بركة في أكل ولا بركة في ولاد ولا مال ولا قيمة للحياة ..
ما هو دي أقل حاجة تحصل في مجتمع فيه آلة إعلامية قنوات عديمة الشرف بتدور على التريند وبس …

الدنيا حتتصلح لما تصلحوا النفوس السودة والخبيثة اللي بقت عايشة وسطنا .
” لا يغير الله ما بقوم حتى يغيروا ما بأنفسهم “.
فاستقيموا يرحمنا ويرحمكم الله
أما إحنا مفيش في ايدينا غير إننا ندعي الدعاء ده
” ربنا لا تؤاخذنا بما فعل السفهاء منا “.