من غير أسباب
بقلم / طارق الشاعر
الحب شعور جواك لفلان
من غير اسباب بتعوزه معاك
والعالم كله مبيحسوش
وبعينك بس تشوفه ملاك
الحب شعور
بيطلع جوا ضلام قلبك
ميت طاقة نور
الحب بلاد تأويك
تداويك
وترحب بيك
وفي وسط التوهه تنادي عليك
تفضل جنبك وان حب الهم يجرجر فيك
متسيبش ايديك
الحب طريق تمشيه وحديك
والناس تندهلك وتقولك ده طريق لهلاك
فتقول ده ملاك
وشوفوه يعنيا اذا مش حاسين
وتحس ساعتها انك وحدك بس العاقل والناس مجانين
الحب فناء
الحب عطاء
الحب لكل مرض ساكن جوانا دواء
الحب ٢ ديما سالكين
هتشوفها بعينك وبقلبك مش عين الناس
وتحس برعشه اما تقرب وبأنه خلاص
مش عايز غيرها ومستكفي
انا كل العالم بعديها
مش فارق وايديها في كفي
الحب سنين هتمر بسرعه
وهتزود روابطكوا ببعض
الحب خناق ميدومش ساعات
وحنين وبعاد او قرب وصد
الحب حاجات ومعاها الضد
هتحبك وتطلع عينك
وتقول كارهاك من ورا روحها
فتسيبها وتمشي هتجري عليك
وتسابق خطاويك بدموعها
فأمانه ان شفته في يوم قرب
ولقيتها بجد صحيح عشقاك
اتمسك بيها وروح بيتها
خليها تعيش العمر معاك
