الدعم النفسي لذوي الهمم… طريقنا الحقيقي للتمكين

بقلم / د. شيرين كمال

الدعم النفسي لذوي الهمم مش كلمة بنقولها… ولا شعور مؤقت بنقدمه… لكنه أسلوب حياة، وفكر لازم نؤمن بيه ونطبقه بصدق. لأننا ببساطة، مش بنتعامل مع حالة… إحنا بنتعامل مع إنسان عنده حلم، وطموح، وقدرة حقيقية إنه ينجح ويوصل.

أهم خطوة في الدعم النفسي هي إننا نشوفهم بعين التقدير مش الشفقة، بعين الثقة مش الخوف عليهم. لأن الشفقة بتكسر، لكن الثقة بتبني… وبتخلق إنسان قادر يقف على رجله ويكمل طريقه بقوة.

ذوي الهمم مش محتاجين نتاجر بيهم ولا نظهرهم عشان ناخد تقدير من حد… هم محتاجين بيئة آمنة، كلمة حلوة، فرصة حقيقية، وإيمان إنهم يقدروا. كل شاب فيهم جواه حلم جميل، وكل واحد فيهم عنده موهبة ممكن تغير حياته وحياة غيره كمان.

الدعم الحقيقي إننا نقوي نفسيتهم، نسمع لهم، نشجعهم، ونفتح لهم أبواب التعليم والعمل والإبداع. إننا نديهم مساحة يعبروا عن نفسهم، ويثبتوا إنهم مش أقل من حد… بل يمكن يكون عندهم إصرار أقوى من ناس كتير.

وتغيير نظرة المجتمع مش بييجي مرة واحدة… لكنه بيبدأ بكلمة، بمقال، بخطوة، بإنجاز صغير بيتحول لقصة نجاح كبيرة. كل موهبة بتظهر، وكل حلم بيتحقق، هو رسالة واضحة إن الإرادة أقوى من أي تحدي.

وفي النهاية… طول ما إيدينا واحدة، وطول ما عندنا نية صادقة إننا نوصل، هنقدر نوصل لكل شيء جميل.

لأن الدعم النفسي الحقيقي… هو إننا نزرع الأمل، ونبني إنسان، مش مجرد نساعده للحظة.
ذوي الهمم مش محتاجين تعاطف…
هم محتاجين إيمان