هند عبد الغنى تكتب : ناس على المقاس
تفهمني او متفهمنيش مش فارق معايا
تصدقنى او متصدقنيش مش فارق معايا
تاخد بالك من انى طيبة او شريرة مش فارق معايا
انا نيتى خير او نيتى شر رأيك مش فارق معايا
تشوفنى زى ماانا شايفة نفسى او تشوفنى باللى جواك ولا فارق معايا
تقبلنى زى ماانا او متقبلنيش دة رايك ميأثرش عليا ف حاجة ولا يفرق معايا اصلا .
اصل يعنى ربنا يخلقنى ف الدنيا لحكمة وعلشان اعبده وحضرتك تيجى تقيمنى!! لا اسفة ولا حيشغلنى الرأى دة فى حاجة
دة مش رأيى بس دة المنطق والصح بيقول كدة …كل بنى ادم مش حيكون له شبيه ولا له حد يفهمه زى ماهو من داخله .
سيب كل واحد له رأى زى مايحب مش ضرورى نوصل لمرحلة الإرهاق والتعب علشان نثبت حاجة فينا او ننفيها..
اللى بيتسول القبول من الناس خسران القبول من قلب سليم مرتبط برب العالمين و الحل ” أصلح مابينك وبين الله يصلح مابينك وبين الناس ” هى دى مركزيتك اللى حتدور حواليها احداثك ف الحياة
خلينا كبار فى عين نفسنا مهما كان حكم الاخر فرأيه حسب نفسيته ومبادئه هو .
انا كإنسان لايمكن اختصاره فى جملتين من رأيك …..فى حكمة بتقول ” من يتأخر فى فهم قواعد اللعبة يجبر على اللعب وفق شروط الآخرين ”
من الاخر الناس مش دايما على المقاس
ف مترسمش وضع فى خيالك للناس ولا تعمل منهم قيمة مش فيهم وترجع تتصدم .
افتكر …الراحة مش انك تلاقى ناس على مقاسك
الراحة انك تكون عارف مقاسك انت كويس و تختار صح.
