هند عبد الغني تكتب : المفضفضاتى
تعتبر الفضفضة علاج للتخلص من الضغوط النفسية والكبت….
ومن الممكن التعبير بالفضفضة بأشكال كتير….
منها كتابة مشاكل وضغوط الانسان بمذكرات خاصة او الجلوس مع اصدقاء او اشخاص مقربين ..اما اللى بيحصل فى زمن السوشيال ميديا هو خرق لكل المبادئ والاعراف وحتى خرق للميثاق الغليظ بين الزوجين …فبرامج الفضفضة اصبحت وسيلة للربح …. تسمع الزوجة تتصل او تاخد مكان بيسموه( جيست ) على احد المواقع وتسرد قصة حياتها وعيوب زوجها ومساوئ الحياة معاه وتفاصيل ماانزل الله بها من سلطان ….
ونفس الموضوع بينطبق على بعض الازواج وفضح الاسرار لكن الحقيقة ان فضفضة الستات اكتر كتيييير وبتتسبب فى كتير من الاحيان ف هدم الاسر …
لان غالبا اللى ماسكين المايك مش مختصين ف الاساس الا فى شئ واحد هو ازاى يتم الربح من خلال نشر الفضايح ….
الطبيعى ان اللى عندها اى مشكلة ف بيتها تجرى على اقرب شخص ليها سواء من نطاق العيلة او خارجها علشان تلاقى الحل ..شرط يكون ثقة او مع مختص
سمعت ف يوم ست كبيرة بتقول ف مرة ..” ارموا اسرار البيوت فى القبور ” لان اللى بينزل القبر مبيخرجش منه تانى
اما ف الوقت الحالى افتح بس اى منصة من منصات التواصل حتشوف وتسمع عجب العجاب …تحت مسميات كتير
واحد نصب نفسه اخصائى علاقات قايم بدور ” المفضفضاتى ” يفتح المحادثات على مصراعيها وتدخل الست المحترمة او المفترض تكون محترمة تفضح بيتها وحياتها وللاسف ممكن بعدها تقع فريسة لمنعدمى الضمير ..
راجل يتصل ويحكى عن ادق تفاصيل حياته اللى بتحصل بينه وبين زوجته ف سبيل ايجاد حل وطبعا كل المتواجدين بيتحولوا لفقهاء والكل بيفتى….
سؤالى بقى …هو صح فضح عورة البيوت وكشف غطا ستر الاسرة بالشكل دة حتى لو تحت مسمى الفضفضة !!؟.
