امرأة تحاور …الزوجة الشكاية
بقلم / هند عبد الغنى
الأم : إزى الحال يابنتى يارب تكون الأمور بينك وبين جوزك هديت شوية ربنا يهديكم
الزوجة الشكاية : ومنين تيجى الهداية بس يا ماما طول ماهو مش قادر يفهمنى ولا قادر يحققلى اللى باتمناه ولا قادر ينفذلى اللى نفسى فيه
الأم : يابنتى انتوا بقالكم حوالى ٧ سنين متجوزين والشهادة لله مشفناش من جوزك الا كل خير والاخلاق الحسنة وبيجتهد ف شغله على اد ما بيقدر
الزوجة الشكاية : وهو لو بيجتهد بجد كان بقى دة حالنا هو احنا بيجد علينا ايه يعنى
الأم : استغفرى يابنتى اللى انتى فيه غيرك بيتمناه ربنا رزقك بنت وولد معافين بدون سعى منك ربنا سترك فى بيت غيرك بيتمناه ربنا رزقك براجل محترم فى زمن عز فيه الاحترام
الزوجة ااشكاية : وعملّي ايه بالاحترام ياست ماما تعالى اتفرجى على صحباتى وصورهم فى الساحل وف المصايف اللى تفرح القلب الحزين ، تعالى اوريكى رومانسية الناس وهى بتتصور عاملة ازاى تعالى اوريكى اللبس البراند اللى شاريينه تعالى اوريكى ايه ولاايه خلينى ساكتة
الأم : كل دة وساكتة طب اسمعى الكلام دة علشان ممكن محدش تانى يقولهولك
الست الشكاية هى الست النكدية ودى من أسوء الصفات المذمومة اللى بتأثر على حياة الأسرة ، الست اللى بتشتكى كتير هى ست فاقدة الثقة بنفسها ودايماً تدور على حد تصدرله شكوتها علشان تشعر بوجودها .. بإختصار ( انا اشتكى اذن انا موجود )
إنسي اللى بتشوفيه على الشاشات علشان غالباً دى ناس بتعوض نقص عندها فى حياتها بشوية صور
لازم تعرفى ان ربنا عادل ووزع على عباده النعم وكل واحد فينا اخد حقه ٢٤ قيراط
بس اللى عندك مش عند غيرك
كلنا فيه حاجة ناقصة حياتنا بس بتكمل بالرضا إرضي تتسعدى ربنا يرضى عليكى وبلاش تمدى بصرك فى حياة غيرك ..
السر فى الرضا
