هى : طلع بخيل
هو : طلعت مبتحبش النظافة
هى : طلع سليط اللسان
هو : طلعت صوتها عالى
هى : طلع عينه زايغة
هو : طلعت عندية
هى : طلع كذاب
هو : بتفشى كل اسرار البيت لأهلها
هى : ابن أمه
هو : شكوتها كتييييير
هى : بيغلط ويتجاوز
هو : منانة ونكدية
هى : مش بيقول كلام حلو
هو : اهم حاجة عندها الفلوس والدهب
هى : بيتعامل بهدووووووء مميت ومستفز
هو : نكديةةةةةةةةةة
دى جزء من الاتهامات اللى بتتقال فى البيوت بين الزوجين …!!وماخفي كان أعظم ..
ولما كل طرف يوصل لمرحلة التعب ويبقى جاب آخره ومش متحمل ( بيشتكى)
والإجابة والحل : الحقيقة مفيش إنسان على وجه الأرض يقدر يجزم انه يقدر بحل كل مشاكل ومنغصات الحياة لكن الحقيقة سمعت الحلول بل خلاصة الحلول من شخصين جمعتهم مع بعض وجدت انهم الخلاصة …
اولا : الشيخ الشعرواى رحمة الله عليه
قال ان اى زواج ربنا عمله ٣ مراحل
سكن : ( لتسكنوا إليها ) فيه سكينة وحب ودلع وكل شئ فيه كما ينبغى ودى احلى مرحلة فإن ضاعت بسبب منغصات الحياة فمن باب المودة
المودة : لو مفيش حب وسكينة فتعيش من باب المودة لان بينكم سنين وعشرة ومواقف فإن انكر كل طرف المودة فمن باب الرحمة
الرحمة : لو فقدنا الحب وفقدنا المودة فنكمل من باب الرحمة لاى سبب رحمة المرض ، رحمة كبر السن ، رحمة الوحدة ….
اما الدكتور العظيم دكتور مهاب مجاهد
قال كل إنسان ربنا خلق عنده قوة تحمل
يعنى ممكن انسان يتحمل نوعية معينة من المشاكل انت متتحملهاش
و انت برضه متحمل شى هو ميقدرش على شيلته .
والخلاصة ان كل إنسان متحمل المشكلة اللى عنده لانه عنده الاستطاعة لتحملها ( شيلتى غير شيلتك )
فمنقدرش ننصح صاحب اى مشكلة بحلول من وجهة نظرنا لكن ننصحه من خلال طاقته هو وقوة تحمله وصبره هو
” لايكلف الله نفسا الا وسعها ”
فاللهم لاتحملنا مالا طاقة لنا به.
