غير تفكيرك .. تتغير حياتك
بقلم / دكتور عمرو شحاتة
رئيس مجلس إدارة مدارس هاينس للغات
ورئيس مجلس إدارة جمعية بادية للتنمية المجتمعية
و نائب رئيس منتدى تغريد فياض الثقافى اللبنانى
لما تجي تبص علي العالم اللي احنا عايشين فيه هتلاقي ناس كتير جدا معاهم شهادات عاليه اوي.. هتلاقي ناس كتير جدا عندهم خبرات ومهارات عاليه اوي. . ولكن مش كل الناس دي ناحجه مش كل الناس دي حققت ذاتها في حياتها..
قوة التفكير الايجابي.. حقيقة أم خداع..؟.. أيوة حقيقة
ناس كتير اتكلمت علي ان الكلمة اللي انت بتقولها ليها قوة ممكن تحركوا وكمان الكلمة اللي بدور في عقلك عن نفسك وهو انك ممكن تقول لنفسك كلمة وتصدق فيها.. فالكلمة دي تنقلك من حالة لحالة تانية خالص.. وهنا لازم نعرف ان الافكار اللي بدور في عقلي ممكن تحركني ازي وتأثر عليا.
هو يعني ايه تفكير إيجابي..؟
هو بمنتهي البساطه اني أسال نفسي انا بعمل ايه؟
التفكير الايجابي مش معناه اني بقول ان كل حاجه حلوه
وبس لا.. التفكر الايجابي هو اني اعمل حاجه في الأساس حلوه.. ده التفكير الايجابي.
اما التفكير السلبي اني بفكر ان كل حاجه صعبه وان كل الظروف بتشتغل ضدي وان كل اللي حواليا متأمرين عليا.
واني مش هقدر احقق افكاري وطموحاتي علي أرض الواقع.
اذا التفكير الايجابي هو ان يكون عندي افكار بتملاني بطاقة اكون بعمل بيها حاجة كويسة في المقابل ..
احنا عندنا مفهوم خطأ عن التفكير الايجابي هو انك تقول انا جميل انا حلو انا سعيد ده مش تفكير ايجابي ده جزء من التفكير بإيجابية وكمان انا برغم الصعاب والظروف تقدر تعمل حاجه كويسة وتوجد لنفسك فرصة من وسط الظروف دي..
وده جزء من التفكير الايجابي ولكن ليس هو عمق الموضوع.
الأفكار الايجابية تأتي من
معتقدات ⬅️ افكار ⬅️ أفعال ⬅️ نتائج
ولذلك نقول ان افكارنا هي اللي هتتحكم في تصرفاتنا.
يعني لو فكرت في فكرة جوه دماغك انك مش هتقدر انك فاشل او الموضوع صعب او انت لسه قدامك كتييير عشان تعرف تعمل ده الفكره اللي بدور جوه دماغك دي بينتج عنها افعال علي أرض الواقع يعني لو في فكرك انك مش هتقدر تشتغل او تنحج فانت هتبعد خااالص عن انك تفكر في البدايه.
وكمان هيكون اسلوبك انك مش قادر وبعد الاسلوب هيتحول لعادة في حياتك انك مش هتقدر تعمل حاجه.
انما لو فكرت بشكل ايجابي وحولت الافكار دي لافعال علي أرض الواقع هتفتح وهتوجد فرصة للبداية والنجاح بالفعل..
اذا التفكير الايجابي مهم جدا ولكن لازم يقترن بإيمان داخلي وأفعال.
جزء مهم جداً.. هل التفكير الايجابي يشفي من الأمراض..؟
الحقيقة ايوه والتفكير الايجابي يشفي من الأمراض وان في تجارب ودراسات اثبت ذلك ان التفكير الايجابي مع تناول الأدوية بانتظام يساعد بنسبه كبيره علي الشفاء. يعني تفكير ايجابي مع تناول علاج مع الإشراف مع الطيب ولكن ليس التفكير الايجابي فقط..
التفكير الايجابي يعزز نشاط الدورة الدموية في الجسم .. تفكيرك الايجابي يعزز الجهاز المناعي لجسمك .
تفكيرك الايجابي بيساعدك علي توليد افكار انك تعملها حاالا زيي هلعب رياضه دلوقتي .. أو هاخد كورسات دلوقتي او هبدء دلوقتي في حاجه جديده مفيدة.
وأخيرا.. لازم نعرف انك لو انت عندك مشكلة وانت فكرت انك تحلها بخطوات منطقيه وزاد عليها تفكيرك الايجابي هيوصلك أسرع من انك تكمل عادي… طيب اعمل ايه عشان املي عقلي بالتفكير الايجابي وسط كم الأخبار والظروف الصعبه..
لازم تحيط نفسك ببيئية مشجعه محفزه عشان تقدر تنحج تطور من نفسك دايما. . اقرأ دايما وده هيفرق معاك في حياتك … اتمني اني اكون قدرت اخليك تبدا تغير تفكيرك .
