هند عبد الغني تكتب : نفهم قبل مانتجوز
كل خطوة محتاجة مننا قرار سواء الجواز أو حتى الطلاق …
لكن مع زيادة نسبة الطلاق اللى اعتقد فاقت نسب الزواج …
اقدر اقولك انا لا ضد الزواج ولا ضد الطلاق فى المطلق …لكن ضد اى فكرة عشوائية ضد اى فكرة مش محسوبة
حيرفع شخص ايده يقولى : مهو اكيد دة نصيب ومكتوب محدش بيتجوز وهو ناوى على خطوة الطلاق من الاساس
ارد عليه واقوله على راسى الكلام
لكن مش بس النية هى سبيلك للنجاح
كونك تقدم على خطوة حياتية مهمة زى الزواج معناه انك الاكيد انك اخدت بالاسباب
واخدت بالشروط والمواثيق اللى بتدعم العلاقة وتنجحها وكل دة ممتاز
بس فى الاخر لازم نسأل نفسنا كويس جدا ..
هل انت او انتى فاهمين ان الجواز كله حلو ولا كله سئ !!!؟؟؟
الاجابة المنطقية من الواقع ..( ميكس )
خليط من الابيض والاسود
شوية حاجات حلوة على كام حاجة مش حلوة …
يوم بتضحك وتعيشه سعيد ومبسوط
ويوم ندمان فيه على فكرة الجواز من الاساس ..
بس اللى عايزة اقوله ان الجواز زى الحياة فيه حاجات حتسعدك وفى حاجات حتخليك حزين
الفرق بقى
انك لما الحياة بتسعدك بتستمر ولما بتخليك حزين برده بتستمر علشان باختصار هى سنة الله فى الكون وان دوام الحال محال …
على عكس الجواز بقى
تعيش سعيد تستمر
شوية تعاسة وكركبة فى العلاقة تجرى تجر خط وتكتب انفصلنا…
صحيح فى علاقات تستحيل بينها الحياة لكن …بس الجواز مش اكلة لو حلوة حاكل ولو معجبتنيش مش حقربلها..
الزواج هو العلاقة الوحيدة اللى وصفها رب العالمين بالميثاق الغليظ..
يارب نفهم العلاقة دى صح او لو مش فاهمينها ولا حنقدر على قوة الاحتمال لمطباتها وامواجها المتقلبة يبقى بلاش من البداية نخوضها علشان بيتظلم فيها اطراف كتير .
