اللى بيحب حد بيهاديه واللى بيحب حد ميحبش يجرحه ، ولا يحب يحرجه…
انك تهادى انسان بهدية دة مش من باب التفاخر او التبهاهى
أمى ربنا يكرمها لها مثل حلو ( بصلة المحب خروف )
يعنى الهدية مش بس بقيمتها لكن بطريقة تقديمك ليها
ربنا يديم خيركم رمضان جاى بعد أيام وزى ما ربنا عز وجل بيكرمنا محتاجين احنا كمان نرد كرمه وفضله وكله من فضل الله …ولكن!!!!!!!
أدى بحب وأكرم بحب وخلى عطائك من عطاء الكريم
غلف الشنطة بطريقة تجبر الخاطر
متخليهاش مصدر اساءة
بلاش تشعر غيرك بنبرة تعالى فى عطائك
افتكر ان السيدة عائشة كانت بتعطر مالها وقالت انه يقع فى ايد الله قبل المحتاج
فإن كنت تعطى محتاج فاعلم انك أشد فى الاحتياج
محتاج رحمة ربنا ومحتاج فضله وخيره
محتاج ربنا يتقبل منك
مش مهم تشوف ابتسامة وبشاشة الوشوش لكن مهم تشعر بفرحة ستر وجبر القلوب .
بلاش شنطة الخير والاسماء اللى شبهها
خلى شنطة الحب تعبر عن نفسها بحب وحياء
بدون أسماء او شعارات
بلاش توقف الناس طوابير وتنزع منهم حيائهم علشان تصور عطاءك وهو فى النهاية عطاء ربك .
ان كنت من اهل الاحسان فاحسن لغيرك بجبر قلبه
وعدم خجله من التعامل معاك بدون رياء او تباهى
ونفكر نفسنا .
اللى بيعطى من قلبه ربنا بيرزقه من حيث لايحتسب
فاللهم بلغنا رمضان لافاقدين ولا مفقودين.
