هند عبد الغني تكتب : الحب مش بيأكل عيش
سمعت بنت بتقول قدام اهلها انا مش حتجوز غير حد بحبه ….
اول رد بيتقالها ..
” بس الحب مش هيأكلك ويشربك ولا هيعيشك في مستوى كويس ”
وكان دة ردها …
عارفه اني لما اجوع الحب مش هيأكلني..
بس عارفه بردو اني لما اتعب وانام في السرير مش هيسندني وهيجيبلى الدوا لحد عندي غير حد بحبه وبيحبني ولما اعيط وانهار مش هيطبطب عليا وياخدني في حضنه غير حد بحبه وبيحبني ، لما اتخن وشكلي يتغير واتبهدل مش هيفضل جمبي يشجعني ويرجعلي ثقتي في نفسي تاني غير حد بحبه وبيحبنى مش هخاف يبص برا مش هخاف يخوني . . ولما الحِمل يزيد عليا وازهق من الدنيا كلها مش هيهوّن عليا غير حد بحبه وبيحبني.. الفلوس ممكن تشترى احسن اكل وشرب واكبر بيت في الدنيا بس عمرها ما تشترى حنيه وراحة بال وامان ابدا ..
الحقيقة انه من اجمل الاحاسيس اللى ربنا جعل الانسان ينعم بيها هى الحب
بس للاسف اصبحنا فى زمن عظم المال على كل شئ ….
صحيح ان المعادلة صعبة ومش بس ف الجيل الحالى….
لكن الاوضاع اللى اختلفت لازم نحاول نتأقلم عليها واللى كنا بنرفضه الاول دلوقتى نحاول نعيد التفكير فيه …
ايوة الحب لوحده مش حيأكل عيش
بس حيأكل حنان وامان
ايوة الفلوس مش حتكون سبب للحب
لكن بتشترى العلاج وبتشترى الاكل وبتجيب البيت اللى حيسكن فيه الحب
فمش محتاجين غير شوية توازن علشان نساعد ان القرار يكون صح ولا الاهل يظلموا ولادهم ولا الولاد يظلموا نفسهم.
