هند عبد الغني تكتب : متحرقش بنزينك
لما بتفول عربيتك وبتلاحظ انك بقيت تدفع مبالغ كبيرة وكل فترة بتزيد شوية حلوين بتلاقي نفسك اوتوماتيك بتحاول تحافظ انك متحرقش البنزين دة ف وقت قليل ولا تحرقه ف مشوار على الفاضى.
ولا تحرقه على مشوار ميستحقش منك تحرق علشانه شوية البنزين الغاليين….
وكل دة مش غلط بالعكس انك تحافظ وترشد استهلاكك بقدر المستطاع حسب قدراتك مش غلط ….
طيب ماتيجى نقيس دة على صحتنا ونفسنا وروحنا ..
كام مرة اتعاملت مع انسان مفهمش طبعك ولا طبيعة روحك !!!
كام مرة اتعاملت مع انسان مش شايف غير نفسه !!!
كام مرة اتعاملت مع انسان بتحاول توضعله خطة علشان يمشى معاك بيها !!!!
كام مرة اتعاملت مع انسان يسئ الظن فيك وانت تبرر!!!!
كام وكام واصلا ليه تحرق من بنزين عمرك وصحتك ونفسيتك علشان مجرد تحافظ على وجوده ف حياتك
مفيش اى شئ ولا اى حد يستحق منك تضحى بكل دة علشان ببساطة اللى فاهمك صح مش محتاج توضيح
اللى حبك من قلبه بجد مش حيسيبك تاخد منه موقف اصلا ولا حيبعدك عنه…
اللى عايزك زى مانت لانه قاريك اهلا اما (الانسان الأمى) اللى معرفش يفهم لغتك
مينفعش ابدا تحرق كل البنزين دة بالغالي علشانه لانك حتى مع كل دة مش حتخليه يعرف يفك اللى هو شايفه فيك مجرد ” طلاسم “…..
احتفظ ببنزين قلبك وروحك وصحتك لانهم للاسف حتى لو دفعت بالغالي علشان تزودهم بعد مايقلوا عمرهم مابيكونوا زى الاول …
دمتم اصحاء
