بيوت مكشوفة …
بقلم / هند عبد الغنى
الجواز أصبح عبارة عن حفلات وتقاس فخامة الحفلة حسب درجة البهرجة والمنظرة بين الطرفين ….وطبعاً الفوتوسيشن اللى بالأحضان وبوس الرجلين والحركات المجنونة …وأصبحت الشياكة والأناقة معتمدة على الروشنة والسعادة المزيفة والتقليد الأعمى لمشاهدة شاذة وأصبحت السوشيال ميديا دجال عصرنا …بيوت متعرية ومفضوحة على الملأ لما زوج يعلن عن حبه لزوجته بانه لازم يكتبلها على السوشيال انها حب عمره وقدره الحلو فى الدنيا….. مراته دى اللى هى اصلا قاعدة جنبه على نفس الكنبة لكن السؤال بقى لما الحب مالى قلبك اوى كدة وفاض الكيل وطفح كدة بيوتكم بتتهدم بسرعة ليه وبتموتوا بعض ليه والمستمريين منكم بيخون التانى ليه ..مهو ياتعاشر بالمعروف ياتفارق بالمعروف ( بالمعروف )
ناهينا بقى عن مكاسب السوشيال ميديا اللى أصبحت كارثة حقيقية خلت البنات ترقص وتتعرى والام تسقفلها والاب عامل نفسه مش واخد باله ….
حلم الفلوس والشهرة وصلنا لكارثة حياتية بنعيشها كنا ممكن نسمع عنها فى الحواديت والاساطير
لما اللى فى قاع المجتمع بقى اسمه ( بلوجرز انفلوينسرز ، بوتيوبرز ) وبقوا ينزلوا صور لممتلكاتهم للتباهى والمنظرة وخلوا الناس الراضية بحالها تتزمر على نعم ربنا اللى عندها وتسخط على حالها …لازم نعلم ولادنا قبل مايتعروا فى الساحل ويرقصوا يتعلموا يعنى ايه اخلاق وحياء ويعرفوا يعنى ايه زواج وانه عهد مع ربنا قبل مايبقى مع بنى ادم وان ربنا حيسأله ويحاسبه على كل كبيرة وصغيرة
والبنات لازم تتعلم ان الزواج صيانة عرض وطاعة زوج وانها لازم تخفض سقف حريتها شويتين ثلاثة ….
اللى بيعيشوا تحت سقف واحد بيقولوا مستقبلنا وبيلغوا كلمة مستقبلى بيقولوا حريتنا مش حريتى بيقولوا حقنا بدل حقى …استقيموا يرحمكم الله ….
