هند عبدالغنى تكتب : بر أمك وأحسن لزوجتك
المعادلة صعبة بل وعند البعض معقدة
ازاى ابر أمى وأحسن لزوجتى !!؟
طيب لو أمى مش بتحب زوجتى اعمل ايه !!؟
طب لو زوجتى ست مش اجتماعيةو فيها من الغباء الاجتماعى اعمل ايه !!؟
طب لو اتحطيت انى اختار بينهم او انصف واحدة حتبقى مين !!؟؟… اسئلة كتييير
ححاول اعملها حلقات مكتوبة اكيد
لكن مبدئيا بر الوالدين دة شئ مفيهوش جدال ولا هزار
لكن السؤال هل بيتعارض بر الوالدين خاصة الأم مع الاحسان للزوجة !؟ ايوة
ليه !! لان الزوج سمح انه ميبقاش عنده خصوصية مع زوجته
الحقيقة ان معظمنا فاهم البر غلط
البر هى انك تقول للام كلام طيب وتبوس ايديها وراسها ورجلها كمان
لكن لو امك حتخليك تخل وتنقد عهدك مع ربنا فى احسانك لزوجتك يبقى دة مش بر دة ضعف منك واستسلام ولازم تفوق من غيبوبة البر اللى مغفلاك
ولازم تواجه نفسك بالحقيقة ….
امك برها لاسباب كتييير منها انها حملتك واحسنت اليك
وزوجتك حملت ولادك وبتحسن اليهم
يبقى من حسن التدبر انك تبر امك وتحسن لزوجتك
كل واحدة ليها كفة ترجح عندك ..صحيح الامر احيانا بيكون صعب بس الراجل بجد بيكون قادر وعارف يوازن ويحسس امه ان علاقته بيها زى ماهى بدون تأثير من زوجته خالص
ويفهم زوجته انها ام اولاده وهى المستقبل وشريكة الدرب
اذا امك ليها اخوات غيرك فهى محظوظة لان اكتر من ابن بيبرها ويسعدها
بس زوجتك ملهاش غيرك يسمعها الكلام الحلو ، ملهاش غيرك للاحسان ليها ملهاش حد غيرك يطبطب على قلبها ويجبر خاطرها …..
الكل حيقف امام الله وحيسأل ويحاسب عن البر وعن الاحسان
ومفيش كفة تنجيك من عقاب وعذاب الكفة التانية
علشان كدة اعقلها..وبر امك وأحسن لزوجتك.
