صفوت عمران يكتب …… فرق الدوري المصري لتشجيع روسيا وأوكرانيا .. أنصار “ماما امريكا” اتفقوا مع “أطفال أردوغان” .. والبعض يرفعون شعار “اللي يتجوز أمي أقوله يا عمي”
كالعادة .. نهوى الإنقسام .. الإنقسام إلى فرق وجماعات .. لا نتفق على مصلحة بلدنا .. بل كل طرف يحدد موقفه وفق الفريق الذي ينتمي له .. المتابع لمواقف المصريين من الحرب الدائرة بين روسيا والغرب على أرض اوكرانيا .. الحرب التي “لا ناقة لنا ولا جمل” في اشعالها .. يجد أننا منقسمون مجدداً .. وكل طرف ينحاز وفقا لمصالحه وللجبهة التي “يأكل منها عيش” دون تحليل منطقي ودون تقديم رؤية واقعية بغض النظر عن توجهك…
1- الجماعة بتوع الإخوان ومن معهم وحلفاء تركيا أردوغان ليل نهار يهاجمون روسيا ويرددون وصف ما يحدث بالمستنقع الذي سوف ينهي مغامرة الرئيس الروسي فلاديمير بوتين ويصفونه بـ”الديكتاتور» ويشيدون بـ”المقاومة الأوكرانية” الباسلة “مشيها مقاومة ومشيها الباسلة” .. والمفارقة اللي بتدل على أنهم خدامين أكل عيشهم أنهم “بيدعموا الرئيس الأوكراني الصيهوني اللي بيدعم إسرائيل وكان بيطالب بقتل الفلسطنيين!!”.. كل ده وغيره من أجل عيون أردوغان ومشروعه المصنوع في المخابرات الأمريكية.. ورب ضارة نافعة .. فده ببساطة يعرفك الناس دي بتستخدم الدين لية ولصالح مين؟! … #عيب_ميصحش_كد
2- الجماعة بتوع العلمانية والليبرالية والحرية وحقوق الإنسان اللي هتلاقي كلامهم .. “هات يا تقطيع في روسيا وبوتن الوحش ابن الست المبقعه اللي دخل يحتل دولة بدون مبرر”، و “ان برضه دي هتكون مستنقع للدب الروسي وهات يا عياط على الضحايا الأوكران وإظهار لانسانية عميقه وهو اصلا مش بيروح يزور خاله في الشارع اللي وراه ولا بيحضر عزاء جاره اللي ساكن جنبه”، “ولا حد شافه بيفتح بقه لما امه امريكا احتلت أفغانستان والعراق ودمرت دول ذي سوريا وليبيا ولا سمحت بتدمير اليمن وقتلوا اكتر من 11 مليون مسلم” .. كل ده عشان السبوبه وأكل العيش الحرام .. والناس لما بتسمعهم بتردد جملة الإعلان التلفزيوني الشهير: “امسحي دموعك يا منال ووفري المناديل” .. الواقع “محدش مصدقهم” بعدما الناس عرفت أنهم “خدامين المصلحة والسبوبه”. #عيب_ميصحش_كده
3- الجامعة بتوع اليسار والاشتراكية والناصرية وعاشت روسيا وريثت الإتحاد السوفيتي اللي هتلقن الغرب درس لن ينساه، وحان وقت عودة القيصر إلى مكانته، و “الموضوع بسيط وهيخلص في كلمتين وأن الواد الرئيس بوتين عيل مفتح ودوقرم ومخلص وحاسب حساباته كويس”، وثقة في فلاديمير لينين وجوزيف ستالين وجورجي مالينكوف ونيكتا خورتشوف وليونيد بريجنيف وميخائيل جورباتشوف نجاح باكتساح، وأن “دي نزهه روسية محسوبة بدقة متناهية مش حرب ممكن تكون بداية لحرب عالمية”، وعاشت روسيا “الملاك أم جناحات، اللي عمرها ما زعلت حد ولا قتلت حد ولا دمرت حد ولا سرقت دول حد واللي دايما بتقف في وش الامريكان والغرب الوحشين أعداء الأمة العربية” .. تفتكر خدمة أكل العيش تخليك تبرر احتلال دولة لدولة ثانية؟! .. امال فين كلامك عن استقلال القرار الوطني وحرية الشعوب ويسقط الاستعمار .. ويسقط الاستحمار …؟!.. والقضية الفلسطينية قضية العرب الاولى؟! … #عيب_ميصحش_كده
4- طبعا فيه فريق رابع حتى الآن يلتزم الصمت لأنه مش عايز يخسر حد من الطرفين … وهو أساساً فريق بيشجع اللعبة الحلوة بس في سره .. وبيشجع الفريق الفائز دايما .. بيستنى اللحظة المناسبة اللي يفوز ده حبيبي وكفاءة على طريقة “اللي يتجوز امي اقوله يا عمي” .. فريق متعرفلوش ملة هو جاي مع المصلحة وبس ..ودول هتلاقي منهم كتير ذي بتوع كل الأنظمة دول “كانوا ولاد مبارك وبعد كده رفعوا شعارات يناير ولعنوا مبارك، ولما جه الإخوان أطلقوا اللحية ومسكوا السواك وهتفوا “الإسلام هو الحل” وهاجموا الجيش، ولما جات 30 يونيه شتموا يناير ولعنوا الاخوان ومدحوا الجيش، ولما جه السيسي وزير الدفاع الاخوان هاجموه ولما بقي رئيس مدحوه، وهكذا هما مع اللعبة الكسبانه.. #عيب_ميصحش_كده.
#الواقع .. أن المشهد أعمق من انحيازات البعض في مصر لمصالحهم الضيقة، وما يحدث بين روسيا وأوكرانيا سوف تمتد تأثيراته خاصة الإقتصادية على مختلف أنحاء العالم، ولا يمكن معرفه تداعياته وتأثيراته بهذه البساطة، خاصة أن كل طرف لديه نقاط عديدة في حوزته لم يستخدمها بعد، ولا يعرف احد هل ستتوقف الأطراف عند حد مين أم يذهبون في الخلاف والصدام إلى آخر مدى.
