إمرأة تحاور ….بنت الأربعين
بقلم /هند عبد الغنى
الأم : يابنتى انا مش حعيش العمر كله جنبك ، نفسى تتجوزى وافرح بيكى وأشوف ولادك
بنت ال٤٠: يعنى اعمل ايه ياماما هو بمزاجى ولا بايدى ، مهو مجاش عريس كويس أصلاً ولا حد مناسب
الأم : أسمعى لا سنك ولا التوقيت مناسب خالص انك تقعدى تفحصى كل عريس
بنت ال ٤٠ : يعنى ايه ياماما اتجوز أى حد حتى لو مش مناسب وأتطلق حترتاحى كدة
الأم : أيوة
بنت ال٤٠ : نعم بتقولى ايوة ، طب ازاى وليه ياأمى وارجعلك بطفل يتربى بدون أب طب ليه بس كدة !؟
الأم : علشان أشوفك وانتى عروسة بالفستان الأبيض
علشان أشيلك حتة عيل قبل ماأموت
علشان ميتقالش عليكى عانس ومش لاقية تتجوزى
علشان مسبكيش ف الدنيا لوحدك يابنتى
علشان محدش يعايرك ب ( عانس )
بنت ال٤٠ : حاضر ياماما
دة حوار وسيناريو بيدور كتييير فى بيوت ناس كتير بيمروا بنفس الظروف ، دى بوابة من بوابات الطلاق اللى بقى زى الوباء ف المجتمع
دة منطق ناس عايشة بيه ، فهل دة منطق يرضى ربنا وهل بكدة بنزرع بذور صحية وصالحة للاستخدام فى المستقبل
رايكم يهمنى …
