عاوزين إيه؟!
بقلم / هند عبد الغني
بناشد المركز القومى للستات والمذيعات المبجلات اللى بيهلوا علينا ينصحونا من ورا الشاشات والمحاميات اللى مش ملزمات انهم يهدوا شوية فى عملية التسخين.. لان طبيعة الحياة وضغوطها بقوا مش محتملين اصلاً…
يعنى يا تقولوا خير او تختفوا فى صمت.. أرجوكم عقل البنات والستات محتاج يهدى ويتظبط مفيش بيوت بتعمر الا نادرا ، حالات الطلاق فى تزايد وزاد وغطى الست المتعلمة اللى بتتآمر على جوزها ابو ابنها وتقتله اياً كان السبب اتجوز عليها واحدة ولا حتى عشرة..
فارقوا بالمعروف وتنتهى الخلافات بحسن الاخلاق والادب..
مفيش اى سبب ينهى حياة انسان بالشكل دة وبالطريقة المرتبة دى الا من واحدة اتملى قلبها وعقلها بحقى حقى حقى
بقى كل واحد مركز فى حقه فين وياخده ازاى ويحصل عليه باى طريقة حتى لو الطريقة غير شريفة وغير شرعية.
احنا فى اشد الاحتياج لنصايح مشايخنا الاجلاء وعلماء الدين اللى يقدروا يوصلوا الرسالة بالطريقة العصرية اللى يتقبلها جيل المهرجانات ومحتاجين ناس سوية فى الاعلام يقدموا لبناتنا وستاتنا النصايح اللى تقوم بيت وتفهم البنات اصول الدين والتربية ويعنى ايه اخلاق فى زمن للاسف تاهت وغابت فيه اخلاقنا وطباعنا وحيائنا.
احنا فى اشد الحاجة ليكم ياامهات ياللى البيوت مش حتتفتح ولا حتتعمر الا بيكم وبتوجهاتكم.. صحيج معظم الستات نزلت للعمل لسبب او لآخر.. لكن البيت والاولاد اهم مليون مرة عملك الاول اللى ربنا حيحاسبك عليه هو تربيتك لاولادك واهتمامك بيهم علمى ابنك يعنى ايه رجولة وجدعنة وشهامة وتضحية علشان بيته واسرته وازاى يسعى دايماً يخلى بيته سعيد وعلمى بنتك يعنى ايه زوجة ويعنى ايه طاعة زوج ويعنى ايه بيت يفضل مفتوح و منور واسرة متكاتفة مش متفرقة وانها اساس البيت وعموده الفقرى وان البيت مش حيدوم الابصبرها واصرارها لنجاحه ….
اسلوب الند بالند مش حتجلب الا الفرقة والخراب والدمار
محتاجين عقلاء من الطرفين لتستقيم البيوت .
