بنشترى ست
بقلم / هند عبد الغنى
جرت العادة من زمان ان البنت لما يتقدملها عريس ويكون ( ملو هدومه ) و شارى كدة وداخل البيت من بابه وناسه طيبين ومأصلين ويقولوا لابو العروسة طلباتكم ايه
فابو العروسة يقوله …احنا بنشترى راجل
الجملة دى كانت كفيلة تخلى الشاب يعمل اى حاجة علشان يكون اد المسؤلية ويكون راجل بكل ماتحمله الكلمة من معنى ….
اما فى زمانا الحالى الشاب او الراجل بيدور على بنت كويسة واخلاق طيبة بشمعة فى وسط دنيا ضلمة ….
محتاج بنت تكون ست البنات او ست الستات زى ما بيقولوا ، ست تفتح بيت ، ست تتحمل المسؤلية ، ست تقف جنب جوزها وتدارى على احتياجه وقت الازمة ، ست متبقاش صورة حلوة فى تابلوه ، ست ميبقاش كل همها وشغلها تغير ملامحها ب٥ ك ماكياج ، انما الحلاوة تظهر الاول فى سلوكياتها وطباعها ، بنت او ست تكون حيية لأن اللى معندهاش حياء معندهاش اخلاق
ست لما تخلف تبقى عارفة وفاهمة يعنى ايه امومة ويعنى ايه تكون مسؤلية نجاح بيت واسرة اولى اولوياتها ….
ست مش نكدية ومش بتتعامل بندية ، بنت مش بتاعة بنطلون مقطع يظهر جسمها ، بنت مش بتاعة بدى واصل لنص بطنها ، بنت عارفة حدودها وعارفة يعنى ايه تتقى ربنا فيه وف بيتها ، بنت شبعانة فى بيت اهلها مش بس فلوس انما شبعانة حب واحترام واحتواء ، الشاب بقى بيدور على بنت تنفعه كأنه بيدور على ابرة ف كوم قش …
انا طبعاً بستثنى ستات عظمة فى كل حاجة لكن اختارت غلط من البداية فكانت النتيجة الفشل وطبعاً مش هى السبب انما الاختيار الخاطئ هو السبب …..
الست لما بتكون محترمة بتكسب قلب الراجل
والاهم انها بتكسب عقله لان القلب متقلب لكن لما يقتنع العقل بشخصية الست تبقى وصلت لمنطقة الامان الحقيقية ….
من الآخر البنت اللى فاهمة انها بشكلها وجمالها وانوثتها تجذب الانظار
فالانثى المحترمة فى الاخر بتجذب القلوب ..
ولما الراجل بيلاقيها تلاقيه من جواه بيقول احنا بنشترى ست .
