أمل شهاب تكتب : ” لا للفكر والتفكير المسطح”
صباح ومساء الخير عليكم واهلا” بكم…
قصة معاناتنا مع الفكر والتفكير ((التفكير المسطح)) تفكير نمطي التواجد والتنفيذ….
جايه اتكلم معاكم النهاردة في موضوع يهمنا كلنا و في نفس الوقت تقولولي فكركم ورأيكم في ((تسطيح العقول)) وإزاى بيأثر على حياتنا….
في رأيي إنها مشكلة كبيرة موجودة جوه بيوتنا كلنا وموجودة أيضاً في أكثر القطاعات والهيئات والمؤسسات الخدمية والتنموية والاجتماعية.. وبتأثر على كل المجتمع….وبتقيد كمان حرية التفكير وإحترام آدمية الإنسان… إحترام دينه وجنسه ومكانته أيا كانت..
التسطيح ده بيحصل عندنا لأكتر من سبب..
وأهم الأسباب عدم وجود تصحيح لآليات التطبيق والتنفيذ لقواعد البيانات أو المتطلبات اللازمة لكل مواطن وبالتالي تسطيح تطبيقها بطرق عقيمه..
والسبب الآخر هو الإعلام والسوشيال ميديا….كلنا بنتعرض لأفكار ومعلومات كتيرة كل يوم….. و المشكلة إن أكترنا بيقبلها على طول ومن غير ما نفكر فيها….بنصدق كل اللي بيتقال لنا من غير ما نتحقق من صحتها أو نحلل موضعيتها بنفسنا ونتأكد من مدى مصدقيتها..
والنتيجة وقتها إننا بنفقد التفكير النقدي والقدرة على التحليل….وبنقبل الأفكار بدون ما نسأل أى سؤال أو نشكك فيها….وده بيأثر على تقدمنا وإبتكارنا كمجتمع……و بنضيع القدرة على التفكير الخلاق والتحدي للأفكار المسلمه..
وعلشان نواجه المشكلة دي…
لابد نبدأ نفكر ونتساءل….
نبتدي نتحقق من المعلومات من مصادرها الموثقه قبل ما نقبلها على أنها حقايق… نشتغل على نفسنا و نسعى للتعلم ونوسع آفاقنا…نسمع ونفهم وجهات نظر مختلفة…..
وده مش هيبقى سهل….
علشان كده لازم نكون مقتنعين ونستعد للتحدي ونفكر بعقلنا المدرك إننا أصبحنا في خطر واضح أو بالأحرى خطر فاااضح ….
وعلشان تقوم لنا قومه وننهض بفكرنا و بمستوانا الإجتماعي وفي جميع المجالات… محتاجين نتعلم نشجع المناقشات الحضارية والتفاهم والإحترام المتبادل للآراء المختلفة ((والأعماااااار)) المختلفة….
ومهم جداً نعترف إننا في إحتياج كبيير إلى التنوع في الأفكار الجديدة المدروسة علماً وفكرا” لأنه بكل تأكيد هتساعدنا نتطور ونبتكر ونقيم ونحترم آداميتنا..
فلابد نكون مستعدين للتغيير بالتعلم والتعليم الذاتي ومواكبة التعليم اللي محتاجله سوق العمل وتوظيف العقول كل” في مكانه.
نشتغل على تطوير توظيف إحتياجتنا و أولويتنا وتحرير مفهوم الممتلكات إلى أنها فقط أدوات مجرد ادوات إستخدامها وقتي والتحرر من نمطية الإتجاة الواحد..
#الخلاصة..
التسطيح بيقيد حرية التعليم والتفكير والتحليل لكل ما يواكب ويحدث بالعالم والمجتمع..
وعلشان نواجه المشكلة….
خلينا نكون مدركين حجم المشكلة ونحلل الفكر والأفكار المهاجرة إلى مجتمعنا قبل ما نقبلها..
نسأل الأسئلة ونتحقق من المعلومات بنفسنا..
و نشجع التنوع في الأفكار …نكون مستعدين للتفاعل والتعلم من وجهات النظر المختلفة.
لو عرفنا نواجه التسطيح ده وقدرنا نتغلب عليه….بالتالي هنقدر نساهم في تغيير إيجابي في المجتمع ((المصري)) ونطلع من حالة الركود والتجميد الفكري المعلب أحياناً والمتوارث أحياناً آخرى…نفك فرزنة السنين ونساعد على تطور عقول مبكسله في الصورة والمضمون .
