هند عبد الغني تكتب : صاحبة المسؤلية
وأنت بتتعامل مع اى ست لازم تعرف تفرق هى ست عادية ولا صاحبة مسؤلية..
وفرق كبيير جدا بين الاتنين…
صاحبة المسؤلية متعودة تعمل كل حاجة بنفسها ، ست يتسند عليها بالفعل مش كلام ، ست جمالها مش بس فى شكلها وملامحها لكن اهتمامها الاكبر عقلها وطريقة تفكيرها ، ست لو فى ايدها حاجة تقدمهالك او تساعدك بيها مش حتتأخر وهى راضية وسعيدة بكدة ، احيانا تشعرك انها ملهاش كتالوج تمشى عليه فى التعامل معاها مش غموض لكن لو دماغك مش حتقدر تتواصل مع دماغها اعرف انك حتخسرها وللاسف تعويضها صعب
صحيح الجمال نسبى من شخص للتانى
يعنى حتلاقى الاحلى والاجمل وكل اللى تقدر تقوله انما لما تتعامل مع اللى اساسها الشكل فقط حتكتشف انها صاحبة عقل فاضى حتنفر منها بعد فترة تعود مش اكتر او مش حتلاقيها يعتمد عليها ست بتتوحل مع اول أزمة ومتقدرش تستشيرها او تاخد رايها ف حاجة الا فى امور معينة هى محور اهتمامها ….
اما صاحبة السمو و المسؤلية معندهاش رفاهية الوقت لحكاوى الستات ف الطبخ وغيره
حتلاقيها شاطرة لكن شغلها واهتمامها دايما ازاى تطور نفسها، معظم قراراتها من دماغها علشان عارفة كويس هى بتعمل ايه ، ست تحسها صاحبة ١٠٠ حرفة فى نفس ذات الوقت بتحاول تقحم عقلها ف كل حاجة بتحب تفهم وتاخد فكرة عن اى حاجة …متواضعة مهما وصل وضعها ..
الجدل عندها مش كتير يعنى لو دخلت معاها ف مناقشة ولاحظت ان عقلك مش ناضج كفاية وميرتقيش لتفكيرها حتسيبك تقول اللى انت عايزه وحتسمعك من باب المجاملة فقط…
ست جدعة مش بتاعة مصلحتها …
من الاخر صاحبة المسؤلية ستات مجتمعة فى ست واحدة تلاقيها طفلة احيانا واخت احيانا وساعات تحس انها ام مهما كان عمرها …
اصعب صفة فيها انها مش مادية
العنصر الوحيد اللى تقدر تكسبها بيه هو الحفاظ على كرامتها
اى ماديات عندها شئ ملوش قيمة جنب كرامتها وعزة نفسها …
على كل المشاعر الحلوة اللى فيها والطيبة اللى جواها زعلها عاصفة بتضلم اى علاقة لو اتخذلت فيها
علشان كدة لما تتعامل مع صاحبة المسؤلية حافظ عليها و كون أدها.
