هند عبد الغني تكتب : كعبها ولا عقلها
….
مؤخرا زاد وانتشر الناس المتخصصة فى حل مشاكل العلاقات الأسرية ومع كدة بيزيد الطلاق …
زادت نسبة الثقافة والاطلاع على كل جديد من بنات وشباب الجيل ومع كدة زاد الطلاق …
زاد وانتشر علاقات الحب قبل الزواج بين بنات وشباب الجيل ومع كدة زاد الطلاق….
زادت نسبة الجمال وعلم التجميل تقريبا مخلاش واحدة مش حلوة كل البنات جميلة ومع كدة زاد الطلاق ….
فى الأعياد تلاقى البنات والستات يتهافتوا على مراكز التجميل ليلة العيد وكأن الجمال والنظافة مقدرلهم الظهور فى الوقت دة فقط وتعتنى كل واحدة بجمالها من كعب رجلها لشعر راسها وبرده بيتطلقوا….
هو العيب ف مين الست اللى بتحاول تبقى حلوة ولا الراجل اللى مش شايف ولا مقدر ….
الحقيقة لا دة ولا دة !!!
الراجل عايز دماغ فى صورة واحدة حلوة
كل راجل عامل زى البيت اللى له مفاتيح خاصة بيه الشاطرة تفهم وتعرف اى مفتاح تقدر تخترق بيه الجدار
واحد مفتاحه الخلفة والولاد
واحد مفتاحه الرقة والجمال
واحد مفتاحه الاكل الحلو من ايد مراته
واحد مفتاحه قعدة صافية رايقة فى بيت نظيف مرتب
واحد مفتاحه الكلام الحلو والتقدير
واحد مفتاحه ست مرحة مش نكدية
حتى لو محتاج كل دة بس بيكون مركز عينه على نقطة محددة فيهم …
دماغ الست هى اللى حتحدد مكان المفتاح فين علشان لما تدخل البيت تقفل عليهم وميطلعش المفتاح من جيبها هى
هو مش محتاج المستحيل هو محتاج حاجة محددة لو اتعملت تستقيم الأمور ويفضل البيت منور دايماً….
دامت البيوت القائمة امنة مستقرة.
