هند عبد الغني تكتب : حاضر.. سبب الطلاق
كل الزيجات الحديثة اصبحت مليانة مفاهيم مغلوطة علشان كدة نسب الطلاق اللى بتحصل عالية جدا والبيوت القائمة اما يتخللها خيانة او طلاق مع ايقاف التنفيذ واما خرس زوجى وغيره من اشكال التشوه الأسرى….
الحقيقة سمعت مرة نصيحة من ام لبنتها المقبلة على الزواج
“اى حاجة جوزك يطلبها منك قوليله حاضر واعملى اللى انتى عايزاه ”
ولما تدور على بيوت كتير حتلاقى الست عاملة بالنصيحة دى دون ادراك منها انها بتجلط وبتخسر الزوج بسماعه حاضر مع ايقاف التنفيذ !!!
واحيانا يتوفر الجانب الاخلاقى والدينى فى الشخص الا ان الجهل بمناحى الحياة الاجتماعية ومعرفة كل طرف بنفسية الاخر بيصعب استمرار الحياة او بتستمر بالشكل الغير مرضى لاحد اطرافها خاصة الزوج ….
للحد اللى يخليه يتمنى ميسمعش حاضر لكن يتمنى يشوفها فعليا …
افعال بسيطة ومشروعة لو كل بنت وست اتبعتها حيتحول الصراع الأسرى لمنطقة سلام وسعادة بينهم ..
الاوضاع المعيشية الصعبة اصبحت مصدر توتر لكتير من الازواج نفسيا واصبح دور الست مهم للغاية للحد من التوتر والضغط النفسى اللى احيانا يفيض الى الموت لاقدر الله اوانفجار بالمخ او جلطات او امراض عضوية نتيجة الحالة النفسية وغيرها من الحالات الصعبة اللى كل يوم بنشوفها وبنسمع عنها …
وبالتالي قليل من التنازل بين الطرفين وخاصة عدم ندية الزوجة للزوج باعتبار ان الست عمود الاسرة وبكدة حتقود البيت والاسرة لمكان يستشعر فيه كل اطراف الاسرة بالراحة والهروب من ضغوط الحياة المريرة
الحياة رحلة قصيرة بتمر بسرعة مخيفة وعلينا اختيار الطريق والطريقة اللى نعيشها بيها
