هند عبد الغني تكتب : الأغنياء حرامية
متتعجبش لما أقول إنى مشفقة على الطبقة الغنية ….وحقولك السبب!!
عشنا سنين وسنين وطبقة فى مصر عايشة أطلقوا عليها السياسيين والإقتصاديين” رمانة الميزان ”
وهى الطبقة المتوسطة اللى كانت دايما بتدعم الاقتصاد وناسه ….
الطبقة المتوسطة حاليا يطلق عليها طبقة ( طبقة عزيز قوم ذل ) لأنها طبقة إتسحقت تحت عجلات التطور أو التهور الإقتصادى حسب رؤية كل مواطن فالباقى بعد إنهيار الطبقة المتوسطة طبقتين طبقة غنية جدا جدا
وطبقة فقيرة جدا جدا …
بالنسبة للفقراء أكيد طبعا وبلا اى شك فى حالة يرثى لها دى مش محتاجة كلام وحالتهم بتعبر عنهم ….
لكن متتعجبش لما أقول إنى مشفقة على وضع الأغنياء جدا ليه !!!؟
لانى بقيت أسمع كتير من كل إنسان بسيط او معدم جملة ..( أدى الاغنياء الحرامية اللى واكلين البلد ) …
فهل من الإنصاف أننا نحقد على الغنى لمجرد انه غنى.
الحقيقة إتعاملت مع شخصيات غنية أخلاقيا قبل ماتكون غنية ماديا والناس قمة فى الاخلاق والتواضع وناس بتقدم خير كتييير جدا وقدرها انها إجتهدت بطرق ما وأصبحت غنية أو ورثوا عن الآباء أو أو
….
ليه حكمنا على كل غنى انه حرامى!!
هل قلة حيلة !!؟
هل حقد طبقى!!؟
هل دة موروث قديم !!؟؟
هل طبيعة البشر كدة !!؟؟
وايا كان السبب …لازم نعرف انه حتى ف “الدين الغنى فضيلة والإفتقار جريمة ”
يبقى لما نفكر نكره .. نكره الفقر مش الغنى ….
الفقر والفقير مطحونين ومسحولين لكن إيه ذنب إنسان أختصه الله بالغنى بالحلال يخرج زكاته وبيساعد قدر إستطاعته عنده أملاك وعربية فخمة ولبسه كويس …هو لازم أظهر متبهدل..لا
” وأما بنعمة ربك فحدث ”
هل الذنب الوحيد فى حياته اللى يكدر عيشته انه غنى!!
إتعودنا من صغرنا لما نشوف نعمة على إنسان ندعيله بالزيادة والبركة ونقول ماشاء الله تبارك الله
فاللهم بارك لكل ذى نعمة وارزق اللهم وافرج على كل مكروب وارزقنا الستر.
