هند عبد الغني تكتب : جوازات إتسببت فى عاهات

كتبت : هند عبد الغنى

عندنا أزمة رجالة وعندنا أزمة ستات وخلينى دلوقتى اتكلم فى أزمة الستات والمرة الجاية افرد الموضوع عن أزمة الرجالة …

الحقيقة ان فى أبحاث بتقول ان اكتر من نسبة 50% من البنات المقبلة على الزواج بيكون زواجهم مبنى على مبدأ الهروب من البيت من ضغط الاسرة والقيود وغيرها .

ونسبة تانية ماشية بمبدأ اللحاق بالقطر قبل مايفوتك ..
ونسبة ثالثة نفسها تفرح وتتبسط بالفرح والشكليات والمقارنات مع بنات العم والأصحاب ..

ويبقى الباقية الصغيرة اللى ممكن تفتح بيت وتدير اسرة وتشتغل دور أم بجدارة .

أصبحت فئة بسيطة جدا هى الباقية الحريصة على اسرتها وفاهمة يعنى ايه زوجة ويعني ايه أم .

فئة بسيطة هى اللى بتتجوز عيوب قبل مميزات علشان تستمر وتكون واعية لفن التعامل .

فئة بسيطة هى اللى ماشية بمبدأ ان مفيش حياة مثالية ولا شخص مثالى احنا مجرد اداة فى ايد ربنا وبنحاول وبس ..

فئة تقدر تتحمل مسؤلية كبيرة بحجم زوجة و ام لانها مش حاجة هينة ابدا ، دة دورها اللى ربنا عز وجل شرفها بيه
الدور اللى مينفعش حد تانى ينوب عنها فيه
الدور اللى بيأهلها للجنة .

الدور اللى لو اهملت فيه انتجت عاهات مشوهة فى المجتمع
الدور اللى لو تركته تبقى اجرمت فى حق الله قبل حق اولادها فكلكم راع وكلكم مسؤل عن رعيته
الدور اللى لازم تتقنه وتلتزم بيه حتى فى حالة الانفصال
انفصالكم عن بعض كزوجين لايعني ابدا انفصالكم عن مسؤلياتكم لاولادكم
كفاية سماع نصايح برامج مضللة من شخصيات مسمومة هدفها الهدم مش البناء والاستقرار .

نصايح نوعية عيشى لنفسك
عمرك مش حيتعوض
حقك تعيشى سعيدة وسيبك من أولادك

كونك تراعى أولادك فى كل الاحوال دة امر من الله مش اختيار ليكى
فارجوكم اللى مش قد المسؤلية تخليها فى بيت أهلها المجتمع مش ناقص عاهات نتيجة جوازاتكم ولو على طريقة اختيارك.

ف بإختصار القاعدة زى ما نصحنا سيدنا النبى عليه الصلاة والسلام هى ” من ترضون دينه وخلقه فزوجوه”.