أيوة أنا الزوجة التانية
بقلم / هند عبد الغنى
قابلت ست متجوزة من ٣٠ سنة تقريباً.. وقعدنا نتكلم عن الجواز والحياة الزوجية وحالات الطلاق اللى بقت بتحصل اكتر من الجواز نفسه …
حسيت من كلامها انها ست جميلة وحكيمة كدة فسألتها عن سبب استمرار الزواج لفترات طويلة دون انفصال والاهم انه بيكون فيه مودة ورحمة.. قالتلى انا كتير بكون زوجة تانية.. فاندهشت من كلامها قولتلها لاء مش فاهمة..
اقعدى كدة اشرحيلى يعنى ايه كتير بكون زوجة تانية مهو اما زوجة اولى او زوجة تانية …
قالتلى شوفى ياستى بعد كام سنة جواز اى زوجين بيشعروا بملل من روتين الحياة وكتير جداً من الرجالة بيحسوا انهم زهقوا ومحتاجين يجددوا حياتهم فكتير بيتجوزوا زوجة تانية على امل التجديد والتنوع … الخ
فأنا قررت اعيش مع جوزى يوم زوجة اولى ويوم زوجة تانية واحياناً بعيش الدورين ف نفس اليوم ..
قولتلها بتمثلى يعنى !!
قالتلى حاجة زى كدة وبشعر بسعادة بكدة كمان ..
بمعنى الزوجة الاولى بتكون طلباتها من جوزها كتير طلبات البيت وتحكيله هموم الاولاد ومشاكلهم وبتطلب منه فواتير كهرباء ومياه وغاز ومصاريف مدارس ……الخ
فبعد كل الحاجات دى الراجل بيحس انه ماكينة صراف او بنك يصرف وياكل و(شكراً) وساعات مفيش شكراً كمان من بعض الستات
فأنا قولت لاء كدة جوزى ممكن يتوه منى ويسرح بخياله لسكة زوجة تانية والكلام دة فقررت اعيشه جو الزوجة التانية
اللى هى لما بيروحلها بيحس معاها انه فرفوش كدة وعلى راحته ومش بقاطعه خالص فى اى كلام بسمعه كويس وبلغى اى كلام عن مشاكل وماديات الحياة والبيت..
وبلغى تماما اى كلام عن مشاكل الولاد مهو محبكش بقى فى ايام تانية ووقت تانى نتكلم فيه فى الحاجات دى ..
ومش بعمل اى حاجة غير حاجات خاصة بيه هو وبس وبحاول اهيأ الاجواء كلها بالشكل اللى يبسطه حتى لو لساعات محدودة.. مهو الراجل لما بيتجوز تانى بيتهيأله انها جنة نزلت من السما ميعرفش انها ست زى اى ست بالعكس ممكن اوى تكون زوجته الاولى افضل ف كل حاجة.. لكن الفرق فى الدماغ والفهم هو بيدور على اللى بيفهمه لان اللى يفهم الراجل يبقى حيوصل معاه لنقطة هدوء وحب دايم مش مؤقت ..
اتعجبت واعجبت كتير بحوارها وفهمها وفكرتها.. بس سألتها هل دة ينفع مع كل الرجالة يعنى هل بتنصحى الستات بكدة قالتلى شوفى لو الزوجة حابة زوجها وعايزة تستقر بتعمل اى حاجة تسعده.. دة كمان بيتوقف على ان الزوج دة بيحبها وبيقدر اللى بتعمله علشان تسعده ..
قالتلى صدقينى لو الاتنين يتعبوا نفسهم شوية فى الحاجات اللى بتسعد التانى مكنش يبقى عندنا كمية المنفصلين دى كلها.. وحتى معظم البيوت اللى متلصمة علشان الولاد بس مفيش بينهم المودة والسكينة اللى ربنا قال عليها …وبعدين استاذنت وقالتلى انا ماشية بقى علشان جوزى جاى نتمشى شوية ونحكى مع بعض اصل النهاردة( انا الزوجة التانية ).
