تيجوا نرجع للطفولة

بقلم / طارق الشاعر

هاتوا فصلي في اولي تاني
سمعولي دروسي ديما
رجعوني لميس تهاني
،،
قوموني الصبح بدري
ويا صوت قران في بيتنا
وامي واخواتي وابويا
والفطار علي طبليتنا
والخروج والبرد شادد
والندي ع الورد فارد
والقلوب صافية وبريئة
ماشي ويا عيال حارتنا
؛؛
نوصل الحوش لسه بدري علي الطابور
نجري واحنا قلوبنا فارده اجنحة زي الطيور
صوت جرس وطابور وشرطه مدرسية
ثني مد وتدريبات وعيال عفية
ميس نبيلة تقول بقوة
انتباه ادوا التحية
انتباه ياعيال دي مصر
عالية زي الرايه ديه
؛؛
راسي تعلي في كل وادي
لما يعلي نشيد بلادي
مصر خيرك ع الجميع
كم لنيلك من ايادي
؛؛
حصة اولي في برد طوبة
جسمي واكلاه الرطوبة
العيال كمشانه لكن
صوتها عالي في النشيد
نفسي اعيش رمضان طفولتي
ولا ليلة أي عيد
لو بجد يخيروني
كنت اقول stop
عيد
هاتوا عمري مرة تاني
نفسي ابدأ من جديد.