أنتى الدولة
بقلم / هند عبد الغنى
تعبتى أتهد حيلك اكل ونظافة ورعاية وتدبير الامور اللى كل ماتحسبيها تبوظ منك وكأن الدنيا بتطلعلك لسانها وبتقولك مش نافعة ..
أجمدى واقوى وحاولى مرة واتنين ومليون.. استجمعى قوتك واعرفى انها مش حتدوم على حال …لملمى امورك قدر المستطاع واعرفى انك انتى الدولة بالنسبة لاسرتك وربما لأهلك كلهم …
انتى الدولة العادلة اليقظة الفطنة بمقاليد الامور
انتى الدولة اللى لازم تعافر علشان تشفى من امراضها
انتى الدولة الحنينة بجد اللى عمرها ماتتخلى عن ولادها
انتى الدولة اللى بتمرض و مش بتموت
انتى الدولة اللى لو انهارت تنهار الدنيا حواليها
انتى الدولة اللى بتساعد مش بتأذى
انتى الدولة اللى بتبنى مش بتهدى
انتى الدولة اللى بتهتم بالنفسية قبل القيمة المالية
انتى الحضن الدافئ لاولادك
انتى اللى بتلميهم وتلمعيهم وتقدميهم قدوة للدنيا
انتى الدولة اللى بتهتم بصحة ولادها وتعليمهم
انتى اللى لو كفرتى الكل وراكى حيبقى كفران
خليكى المؤمنة الصابرة اللى ربنا عدى عليها كتير وصبرت وجُبرت..
انتى كل حاجة.. انتى اللى لو انسحبتى من دورك الكل حواليكى حيضيع ويقع علشان ملهمش غيرك
عمرك شوفتى بيت من غير سقف وجدران
انتى الوتد والسند.. ارجوكى حاولى ومتيأسيش
افهمى كويس دورك وإنك انتى الدولة.
