هند عبد الغني تكتب : ست تفتح النفس
الست رمانة الميزان فى الحياة ، الست الحلوة مش معناها صاحبة الملامح الجميلة والجسم الممشوق والتفاصيل الفاتنة …الست الحلوة اللى لما تتكلم معاها تبقى مش عايز الحوار يتقفل
عايز تمد ايدك فى قلبك وتهديهولها …الست الحلوة تخليك فى عز مانت مكتئب وحزين تخرج وترمى وراك همومك وتقولك قوم لنا رب كريم والدنيا صغيرة اسند عليا وانهض وعيش سعيد …
ماهى مش مستاهلة نعيشها ف نكد
الست الحلوة تلاقى وشها مبتسم وفرفوشة ف نفسها أياً كان سنها..
انا مرة سألت جدى الله يرحمه وهو كان ابيض ووسيم وزى القمر وجدتى الله يرحمها كانت سمرااااااا خالص..
انت ايه اللى يخليك تحبها الحب دة كله.. رد وقالى وشها بيضحك ومش نكدية ولا بتكشر وست جدعة وقوية يعتمد عليها..
لقيت ان اللى يقولك الراجل بيحب الست الضعيفة دول ناس فهمهم ضيق او فعلاً عندهم نقص ف شخصيتهم..
الست القوية ست ( full option ) تلاقيها حلوة وقوية وحنونة وجدعة وسند واصيلة..
من الاخر الست الحلوة ست تفتح النفس على الحياة حتى لو الحياة ماشية بظهرها….
وزى مافى ست تفتح النفس فى كمان راجل يفتح النفس ايوة طبعاً راجل كدة جميل فى نفسه وخفة دمه سبقاه يدخل بيته وهو رامى التكشيرة على عتبة البيت ، راجل صوته هادى فى نقاشه ومش مستبد ولا مسيطر بالقوة انما سيطرته بالحب والحنية والكلمة الحلوة..
راجل يعرف تفاصيل شخصية الست كويس وعارف امتى يتناقش وامتى يسكت وامتى يطبطب ، راجل بيهتم بلبسه وريحته ومظهره مش بس وهو خارج انما ف بيته علشان ميخرجش ابدا من قلبها
راجل خيره ف بيته ولاهل بيته ، راجل بيعامل مراته ملكة واميرة متوجة وست الكل..
راجل عارف ان اساس الرجولة الحفاظ على اسرار بيته وفاهم كويس ان سرها سره وبس ، راجل بيخلى مراته رقم ١ …
من الاخر الراجل الحلو اللى يفتح النفس هو اللى بيقدر يخلى مراته كمان حلوة تفتح النفس والعكس صحيح
ربنا سبحانه وتعالى قال ” خلق لكم من أنفسكم ازواجا لتسكنوا اليها ” مش لتنكدوا عليها.
