هند عبد الغني تكتب : حب إضطراري
عادى تحب حد بيحبك ، انسان بيدعمك، انسان بيخدمك، انسان طيب وقلبه عطوف، كله دة عادى يتحب
انما اللى فعلا مش عادى ولا منطقى انك تكون مضطر تحب حد ..اه قريتها صح
مضطر
وهو الحب ينفع فيه اضطرار
الإجابة: نعم ، ايوة ، بلى ، yes
خد عندك ..
* راجل اتجوز وانجب بس حاسس انها مش الست اللى كان بيتمناها لكن فيها من الصفات اللى تشفعلها ويخليهم يكملوا خاصة وجود ابناء بينهم
فيضطر علشان الدنيا تمشى يحب حب المضطر …
* زوجة اتجوزت وانجبت وراضية وكونت اسرة لكن زوجها اتغير لأى سبب بعد رحلة و عشرة طويلة فهمى حفاظا على اسرتها بتكمل مهمتها علشان اعتبارات كتير ممكن يكون محدش شايفها غيرها فتظهر انها بتحب لكنه حب اضطراري…
وقيس على دة حاجات كتير
حب الاخ وحب الاخت وحب الام والاب وحب الاهل او ….الخ
علشان فقط بتربطهم صلة رحم
كله يندرج تحت مسمي حب المضطر
مديرك فى الشغل مش الطف حاجة وسياسته مش عاجباك لكنك لازم تظهرله محب حفاظا على شغلك لكنه حب اضطرارى ..
لكن الحب دة بيدهس فى سكته شوية صحة على شوية نفسية على أمور كتير تانية ….لكنها الحياة بتمارس احيانا فرد عضلاتها معانا .
