الجملة اللى اول حاجة بتسمعها ومستنياك على باب الدنيا …
دى اللى سبقت اسمك قبل حتى ما حد يناديك
جملة قصيرة بس مضمونها كبير
بس ياترى بتتسمع جوانا ازاى !!
وهل علينا فعلا نسمع كلام امنا على طول الحياة !!
وهل اسمع كلام أمك امر وتنفيذ ولا طبطبة من قلبها على قلبك !!
الجملة اللى اتقالت علينا واحنا حتى مفتحناش عيوننا كأنها تعويذة حماية
بتحصنا وتحمينا كدرع واقى…
بس لما بنكون كبرنا الجملة مفهومها بيتغير شوية بشوية
ف سن الطفولة بياخدوها أوامر وراحة لدماغ الام وكتير بيرفضوا الأوامر
ف سن المراهقة والشباب بيحسوا انه فخ وحصار وخنقة وسجن بيحلموا يهربوا منه
فى سن النضج وانك تعيش دور أم او اب بتبتدى تشعر نفس المشاعر وتعيد نفس الجملة( اسمع كلام أمك ) كأنه ميراث …
باعتبار ان الام هى الشخص الاول المباشر اللى بنتعامل معاه اول مابنتعرف على الدنيا …
علشان كدة زى مابنقدم النصيحة للشباب ونقوله وانت بتختار الزوجة شوف الام الاول
كمان مهم اوى البنت لما يتقدملها شاب تشوف الام اللى ربت واحتوت وقدمت المبادئ والاخلاق ..
مؤخرا لما بنسمع ونشوف خلافات او اى توتر فى العلاقة بين الزوج والزوجة بنكتشف ان الوقت اللى بيكون فيه الزوج هو سبب التوتر او المشاكل ان والدته فى الغالب هى اللى فى ظهره هى سبب قوته هى اللى معاها هى البوصلة اللى بتحرك الدنيا وكل شئ الا مارحم ربى
فياريت نعرف نفرق امتى ننفذ
” اسمع كلام أمك “
