هند عبد الغنى تكتب : جمالها مش مانع للتانية

اتربينا على ان الحلوة تكسب ، الجميلة لها الاولوية تكون فى الصف الأول والباقى بعدها ..واترسخ فى عقولنا ان الراجل طالما اتجوز ست حلوة يبقى جمالها اصبح صك امان ليها وحماية..
الحكاية مش جمال وبس
الحكاية اصلا كتييير مش بتكون فيها
جمالها عينه بتاخد عليه
عقلها بيزهق من العقل بزيادة
السنين والعشرة كلام جدتى وجدتك
الفلوس بعد فترة قلبه بيتجمد زى رصيد البنوك ..

التعدد عليه خلاف كبير لكن خلينا نتكلم بهدووووووء انه يتجوز مش حرام
انه يتجوز دون علمها قالوا برضه مش حرام …طيب الحرام فين الست بذلت جهد وطورت نفسها واحلوت ولبست وعملت اللى عليها وزيادة وبقينا نشوف الستات غير زمان ..الست بقت ماشية على الموضة ونفخ وشد وكل ماتشتهى الأنفس ومع كدة الراجل بيتجوز واحدة تانية ممكن متبقاش حتى فيها اى مقومات للجمال يبقى المشكلة مش الست انما المشكلة جوة الراجل..

كتير بنشوف الراجل متمسك بزوجته ام اولاده حتى لو مش حب لكن حفاظ منه على عشرة السنين والحفاظ على اولاده وعلشان ضميره يكون مرتاح ..
لكل حاله وضع مختلف بس لازم نغير فكرة ان جمالها حيحميها ادينا شوفنا معظم الحالات جمالها ممنعش انه يتجوز التانية ..
وحابة اعرف للى بيقول طالما اتجوز حتى لو بدون علمها دة كان موجود ايام الرسول عليه الصلاة والسلام..

طب ماالاخلاق كانت موجودة والنخوة كانت موجودة والقوامة كانت موجودة
الخلل لا فيه ولا فيها الخلل اننا طوينا صفحة الصح وفتحنا باب الشيطان اللى بيتفنن ازاى يجعلنا نجرح بعض ونقطع بعض ونفضح بعض من غير تأنيب ضمير ، ازاى يكون كل طرف انانى فى نفسه ، ازاى اخد من الشرع اللى يعجبنى واتغافل عن اللى مش على هوايا
مش حتستقيم بالجمال

طب حتستقيم ازاى !!
لما ربنا يوفق ويحط ايده قبل ماكل طرف يحط ايده فى ايد التانى
حتستقيم لما الست تبقى ست بجد مش منظر وشكل وبس
حتستقيم لما الراجل يبقى قوامة وراجل بجد بكل ماتحمله الكلمة من معانى وأفعال .

لما النوايا تكون حلوة مش بس الشكل يكون حلو علشان من الاخر الجمال نعمة بس مش ضمان لحد