سم الستات
بقلم / هند عبد الغني
* الست ريرى : صباح الورد والياسمين عليكى ايوة انتى وبس انتى نص المجتمع غصب عن اى حد ياجميلة
* بنت العز : مساء الخير عليكوا ولازم اقولك انك انت سيد الرجالة وصاحب البيت والحاكم بأمره غصب عن اى حد
* الست ريرى : راجل مين دة اللى يعرف يفتح البيت لوحده من غيرك هو من غيرك ولايسوى حاجة
* بنت العز : لا بقى دة بيته وحاجته ويقعد مكان مايقعد ان شاء لو دخل البيت بجزمته هو حر بفلوسه
* الست ريرى : خلاص لو مش عاجبه خرجيه من حياتك واعمليله بلوك بلوك بلوك خليه يتأدب
* بنت العز : عادى يعنى هو انتى بس تعرفى تعملى لامك واهلك المحمر والمشمر وتيجى لحد عنده لا تقورى باذنحان ولا تحشيله كوسة
* الست ريري : انت الحاجة الحلوة الممتعة فى الحياة وصدقينى حيدور عليكى حيدور عليكى حطى رجل على رجل وكبرى دماغك
* بنت العز: اصلا دة بيته ولو مش عاحبك كمان حيدى المفتاح لمامته تفتح وقت ماهى عاوزة بيت ابنها انتى مالك
” موحدة القطبي” : اسمعى يافالحة انتى وهى ياللى مش فاهمين حاجة انا جبتلكم الخلاصة الراجل ياحزينة منك لها مش بيحس انه مبسوط الا فى (الحرام) ايوة زى مابقولكم فى الحرام وبس يعنى وهو مع واحدة غير مراته تلاقيه الحلاوة والدلع والكلام الحلو والهزار كله ييجى لحد مراته يبقى النكد كله
ف متتعبوش نفسكم دى طبيعة الرجالة الا ناس قليلة خالص خالص منهم
وانا كامراة بقولكم حسبنا الله ونعم الوكيل فيكم وف اى حد بيحرض لهدم البيوت والاسر
ولا واحدة فيكم مؤهلة تنصح ولو نصحت النصيحة مش فى العموم ياجهلة كل مريض بيحتاج لوصفة دواء خاصة بيه
لكن الجرعة اللى بتصدروها كل يوم فى روشتة اعلامية دى سموم وبتر لمفاصل المجتمع وشايفة ان العيب مش عليكم للأسف العيب من القنوات اللى فاتحلكم ببانها لله وللوطن كدة ولا هاممهم خراب ولادمار كل اللى شاغلهم الفلوس ونسب المشاهدة
تانى وتالت وعاشر حسبى الله ونعم الوكيل.
