قصص أمثال شعبية
بقلم / داليا طايع
أمثال كتيرة بنتدولها في حياتنا اليومية بس ياترى عارفين ايه العبرة والحكمة و الفايدة اللي اتسببت ان المثل ده يشتهر ويفضل لحد عصرنا الحالي تعالوا نفهم ونعرف القصة اللي اتسببت في المقولة او المثل .
النهاردة هحكيلكم قصة مثل كدي كدي يا ام عباس واعملك القبر نحاس
حكايتنا النهارده هتكون مع ام عباس اسمها الحقيقي عنايات عندها 5 أولاد وكبيرهم اسمه عباس وكانت ام عباس عايشة في فقر سنين وسنين علشان تحوش في الفلوس تقدح وتكدح وتوفر علشان ابو عباس يقدر اللي بتعمله علشانه وفى يوم من الأيام دخلت على ام عباس جارتها اسمها انعام وقالت لها يخيبك يا ام عباس مال وشك كله تراب وجلابيتك مليانه هباب ؟! وقالت لها ام عباس وايه يعني يا اختي يا إنعام ده ابو عباس ما يهمهوش اذا كان لبسي حلو ونظيف ولا لا
ده حتى وعدني وقال ( كُدِّي يا ام عباس واعمل لك القبر نحاس)، راحت انعام قالت لها وانتي صدقتيه !! قالت أومال ده جوزي وأبو العيال ردت عليها انعام يا عبيطة ده الراجل ما يحبش غير الست الأليطة الحلوة والطعمة وعاملة في البيت زيطة، راحت ام عباس قالت لها فشر ….ده جوزي غير باقي البشر، ردت عليها انعام طيب وانا هثبت ليكي ان الكلام بتاعي صحيح، فقالتلها ام عباس طب ازاي.
راحت انعام قالت لها الأول جوزك فين ؟ ردت عليها ام عباس مسافر وهيرجع كمان يومين.
قالت لها انعام يبقى تمام نبدأ الخطة اوام عشان نلحق نخلص قبل مايجي جوزك تعالي معايا على الكوافير تصلحلك شعرك ووشك وبعدها نشتريلك فستانين حلوين ومهشتكين ونتفق مع دكتور الحتة على باقي الخطة، وعدى فعلا يومين ورجع أبو عباس لقى بيته مليان ع الآخر ناس كلهم لابسين سواد وستات بيسكتوا في الولاد اتخض وقال ابو عباس ايه اللي حصل الناس قالوا ليه أم عباس تعيش انت، راح ابو عباس قال ازاي؟ دي كانت صحتها عال العال !
قالوا له اسأل دكتور الحتة يقولك جات لها سكتة ماتت فى الحال، فبكى وقال خسارتك يا أم العيال يا غالية يا ام عباس
ودخل لقى عليها الكفن وقبل ما يخرج بيها للمدفن
لقى وراه واحدة قمره منورة جميلة بتعيط وتقول مُتي بدري يا صغيرة، راح ابوعباس قال لها إنتي مين؟ قالت له صاحبتها من سنين، رد عليها يادي الهنا يادي المُنى تتجوزيني يا سكرة ؟
راحت قالت له يا راجل مراتك لسه ما طلعتش بدفنتها
قال لها مالكيش دعوة هدفنها وارجع أكمل الفرحة واتجوزك
فسألته الست الجميلة سؤال : ألا قولي يا سيد الرجال؟
إنت قلت لأم عباس هعملك القبر نحاس عملتهولها ولا لسة ؟؟؟؟
راح ابو عباس قال لها : اعمل لمين نحاس ده انا كنت نسيت اتجوزت ليه من الأساس ودي ولية ما كانتش من صنف الستات كشرية وعكرة ولسانها لتات
ردت عليها يا لهوى بقى ده كل فيا يا اللي ما يتمرش فيك العشرة وانا صابرة وأقول هيهنيني بكرة قال لها ميييييين ؟!!
قالت له أنا ام عباس اللي قلت لها هعملك القبر نحاس
والله يا راجل لانا ضرباك بالمداس ومخلياك عبرة لكل الناس الخُساس والخاينين اللي ميطمرش فيهم العشرة .
بقي في عصرنا الحالي المثل بيتردد تريقة على لما الست تبخل وتحوش وتهمل في كل شئ فيجيلها الرد اوعي تعملي زي ام عباس وتفتكري انه هيعملك القبر نحاس.
المرة الجاية هحكيلكم قصة مثل الحيطان ليها ودان.
