إمرأة تحاور …مهووس ستات
بقلم / هند عبد الغنى
الصديق : ازيك ياصاحبى اخبارك ايه فينك بقالك فترة مختفى !؟
مهووس ستات : الكلام ف سرك اتجوزت عرفى على مراتى !؟
الصديق : يانهار …..ليه عملت كدة انت بتقول ان مراتك كويسة وربنا رزقك بالولاد منها وبقالك ١٢ سنة متجوز ومستقر ليه بس كدة يابنى ؟؟؟؟؟
مهووس ستات : انا بقولك اتجوزت يعنى مش ماشى شمال دة جواز ياعم بس عرفى ودة ياسيدى مش حرام دة جواز برده ، وبعدين اديك بتقول بقالى ١٢ سنة يعنى زهق وملل وطفش ملينا يابنى انت مبتزهقش !!!
الصديق : الجواز العرفى شيوخ كتيييير جدا قالوا انه حرام لابس قناع الحلال ( زنا)
وبعدين يااخى هو احنا بنتجوز بالمدة نزهق فنغير لو على كدة عمرنا ما حنشبع ولا حيرضينا حاجة
مهووس ستات : ياسيدى اهو اسمه جواز ، وبعدين مراتى اتغيرت خالص ومبقتش زى الاول وانا بصراحة حاسس انها مش مالية عينى وقلبى ، شكلها اتغير وبقت مهملة فى كل تفاصيلها مبقتش احس معاها بالسعادة بصراحة
الصديق : انت من سنتين برده مريت بظروف وسمعتنى كلام شبه كدة بس مكنتش متجوز عرفى كنت متصاحب على واحدة ، ودة دليل كبير ان عندك خلل كبير ياصاحبى رغم كل اللى قولته عن مراتك مش مبرر ابدا يخليك تتصرف كدة، ثم اللى شكلها اتغير دى بسبب اهتمامها ببيتك وولادك وكل خط فى بطنها من الحمل والولادة ، كل الم ف ظهرها من قعدة الرضاعة ، كفاية انها تكون ست شريفة تحافظ على شرفك فى زمن عز فيه الشرف
مهووس ستات : بص انا فعلا بفكر اسيب اللى اتجوزتها عرفى دى علشان فى واحدة تانية مش قادر اوصفلك جمالها وشكلها حاجة خيال
الصديق : يابنى مفيش راجل ف الدنيا مش نفسه يعيش اجواء حلوة فيها حب ورومانسية بس فى الحلال ، لكن اللى انت فيه دة شبه اللى بياكل حاجة حلوة تديله احساس مؤقت بالسعادة ويكتشف انها زودت السكر والدهون وجابتله الامراض وبعدين نصيحة منى لانى بحبك ياصاحبى راجع نفسك انت كدة ماشى فى طريق حتتأذى فيه كتير وحتأذى فيه سمعتك ومن بعدها سمعة ولادك ، انت بالطريقة دى مش حتشبعك ستات الكرة الارضية
مهووس ستات : يعنى ايه انا مريض ومحتاج اتعالج من اللى انا فيه ولا ايه
ولا بسبب اهمال مراتى ليا
الصديق : انا مش ببرأ مراتك ممكن تكون غلطانة فى بعض الامور وشكلها اتغير او غيره
لكن انت كمان كراجل اتحولت لمهووس ستات ودة داء لازم له دواء ولازم تبقى عارف انك مش حتفضل كدة على وضعك وشبابك العمر كله حتحتاج فى وقت لسند ووتد ، لعيلة ، مش لواحدة تاخد منك قرشين علشان تسمعك حاجات تسعدك لشوية وقت وشكراً
راجع نفسك ولو حكم الامر استشير مختص واجتهد قدر المستطاع علشان تحافظ على بيتك واسرتك ( عيلتك حمايتك ).
