الفئات الآمنة.. والحتة الناقصة
بقلم / هند عبد الغنى
كل انسان فينا بيسعى طول حياته ليوصل لمرحلة من الكمال وبننسى ان الكمال لله سبحانه وتعالى ..
الزواج بيتم وبعد فترة من السعادة والراحة يكتشف احد الزوجين انه شاف صفة او ميزة فى شخص تانى فينجذب لانه يفتقد الصفة دى فى الشريك.. ودى بتبقى هى الحتة الناقصة فى حياته ( دة تخيله )
سواء كانت الحتة الناقصة دى هى الجمال او رجاحة العقل او النظافة او الغنى او…….الخ
ومن هنا بيوت كتير بتتهدم تحت بند ان احد اطرافها يفتقد سعادته
وميعرفش ان الحتة الناقصة دى جواه هو وفي عينه هو.. وانه مهما كان الانسان اللى ادامه حلو لازم ولابد حيكون فيه اجزاء حلوة واجزاء مش حلوة حتى هو نفسه ….يبقى السعادة انك تسعد اللى معاك مش انك تحاول تستشعرها فى اماكن ومع ناس غلط مش شبهك ولا من حقك اصلا تختلس السعادة على تعاسة غيرك ….ارضى باللى فى ايدك وبلاش تطلق بصرك على غيرك …
فى الشغل بيسعى الانسان يوصل لاعلى المراتب واعلى الاماكن ودة طموح مشروع لكن تذكر دايما وانت فى القمة هل انت لك تأثير سلبى على غيرك !!؟
هل وانت فى القمة بتدوس على ناس فى القاع !!؟؟
هل القمة بيدفع تمنها ناس غيرك بغير حق !!؟؟
لكن الحتة الناقصة هى اللى بتسيطر…
الحتة الناقصة جوانا مش فى اللى ادامنا ، الحتة الناقصة بتجلب علينا الشقاء وتبعد عننا السعادة وراحة البال والسلام النفسى
الحتة الناقصة بتبعد عننا الفئات الامنة اللى هما مصدر الامان والحنان والحب …الناس المحبين لينا المخلصين بلا تمن السند وقت الازمات الناس الاصيلة اللى بتقف فى ظهرك وتحميك من شرور الدنيا
الفئات الامنة ناس تقف معاك وانت فى الدنيا وتحبك باخلاص وتفتكرك لو رحلت للعالم الاخر وتدعيلك بكل وفاء واخلاص.
وجودنا فى الدنيا بالايجار وليس لنا فيها ملك فالارض ومن عليها ملك للملك وحده …
اتخلصوا من عقدة الحتة الناقصة قبل فوات الاوان وتحصنوا بالفئات الامنة لعلها المنجية بعد رحمة الله .
