في حب الأهلي
بقلم / محمد جمعة
فى حب الأهلى أنا بكتب بدون قافية ولا بحر
أعبر عن اللى جوايا وشايف كل ليلة نصر
مشرفكم ونسرى فى السما عالى يطير ويطير
عامل كل يوم إنجاز بسمع العالم من سيرتكم خير
رافع فى العلالى الراس ورايا ناسى والجماهير
أنا الأهلى إللى كل دقيقة بتعدى بسيب أساطير
وأصغر فرد فى المنظومة دى يعلم كتير وكتير
مانيش واقف عند بطولة اتاخدت منى ظلم
بشوف عيبى وأحلف كل يوم بيمين أعيد الحلم
أناطح فى كل دولة سحاب وأكسب كل يوم أحباب
وغيرى شاغل نفسه بالسحر وسيرته هباب
باصص للى أنا فيه وناكر الحق بدون أسباب
وناسه عايشين ومش عايشين وداره خراب
بلاعب الدنيا ومش حاطط لهدفى حدود
بشوف الدنيا من فوق واسمى فى البرايا يسود
ولادى بيرعبوا السامع من ضباع وأسود
وكل بطولة جمهوري بالسعادة يعود
وبكتب بالعرق والجهد أنا اسمى طول العصر
وسايب فى الورا حكايات تشرف مصر
أنا الأهلى اللى مهما اتقال فيه مايوفيش
بحقق كل حلم جميل وأسيب ورايا سيرة تعيش
أنا الأهلى وقادر أعبر الصعب والأخطار
لا أنا بكسب بالحكام ولا بستنى مجاملة فار
وبلعب على المكسب ولو بكسب بقول عادى
كبير القوم يقع ويقوم أجمد من الماضى
لا حزنه يدوم وفى الفرحة يكون هادى
ما هوش غلاط ولا شتام ولا سباب ولا خاين
ولو سبيته وشتمته وقلت كتير تلاقيه صاين
لا يوم بيرد على نباح ولا شاغل دماغه بيه
ومش فاضى لان تاريخه بيتسطر هنا بايديه
ريال مدريد ومن قبله بطل ألمانيا وإيطاليا
ورايته فى المغرب خفاقة فوق كده وعالية
ومهما كانت النهايات أكيد بيبات فخور بيها
يهدى للبلد ذكرى يعيش ويعيش ويحييها
أنا الأهلى.
