هند عبد الغني تكتب : أخرجى حققى ذاتك
….
إزاى يعنى البنت تتعلم وتتخرج من أرقى الجامعات واحيانا مع مرتبة الشرف وفى النهاية تقعد فى البيت تربى العيال !!!؟؟؟
السؤال دة مش سؤال بس دة بيكون سخرية من كل بنت اتخرجت ومش فى احتياج للخروج للعمل فقررت تقوم بدورها الرئيسى وهى ان تكون راعية لبيتها واسرتها….
قررت تقوم بدور أم….
الحقيقة الشغل فى حد ذاته مش غلط ولا عيب لكن بشروط اولها واهمها عدم التقصير فى دورها الاساسى اللى اوجدها الله من أجله وهو ان تكون راعية لمنتج قومى رابح مفيد لنفسه وللمجتمع….
واذا مضطرة للخروج للعمل فعليها الحفاظ على عملية التوازن….
مؤخرا تمشى فى اى مكان تلاقى الاب والام خرجوا من البيت للعمل والسؤال الجوهرى مين بيراعى الولاد مين بيربى مين بيقوم اى سلوك خاطئ مين بيحضن مين بيساند!!!!
صحيح ان الوضع العام اجبر الام للخروج للعمل كمساعدة ومساندة فى كتير من الاحيان لكن فى حالات كتير من البنات والنساء خرجت للبحث عن مفهوم ( تحقيق الذات )
واعتبرها افشل جملة لتشويه صورة المرأة والام …
هى تربية جيل محترم ونافع مش تحقيق ذات !!
مهنة أم لوحدها والجلوس فى البيت مهما كان المؤهل والشهادة مش تضحية بل هو تحقيق الذات فى حد ذاته …
تشريف المرأة كونها تكون أم وراعية وربة المنزل يجعلها تحصل على اعظم شهادة تحصل عليها كل امرأة فى الحياة وهى أم مع مرتبة الشرف
وتكريم رب العالمين لها لتحقيق ذاتها فى دراستها وعلمها ثم تحقيق ذاتها فى انتاج جيل صالح ونافع فى المجتمع …
