ناس كتير قوى بتزعل لما حد يقولها الجملة دى..على اساس انها بتتقال لما شخص يحب يخرج بره عادات اهله او حد يطلب طلبات بشكل مبالغ فيه باختصار بتتقال لما تحب تكبح طلبات شخص وتحجمه..
لكن انا شايفة اننا ياريت نعرف نعيش عيشة اهالينا اللى كانوا عايشين بالفطرة والطيبة والبساطة
اهالينا اللى كانوا راضيين وحامدين وشاكرين..
اهالينا اللى كان الصغير فيهم بيحترم الكبير والقوى يقف جنب الضعيف
اهالينا اللى كانوا بيحسنوا لسابع جار وااللى كانوا بصحيح بيصلوا الارحام
اهالينا اللى كانت بسمتهم تسبق سلامهم ويحاسبوا قوى على كلامهم
اهالينا اللى قدروا يربونا على الصح والواجب والاصول
اهالينا اللى عمرهم مابصوا للى مع غيرهم وراضيين بقسمتهم ونصيبهم
اهالينا اللى كانوا واقفين جنب بعض ويساعدوا بعض ويتمنوا الخير لبعض
اهالينا اللى طلباتهم من الدنيا راحة البال والسلام النفسى
اهالينا اللى ممكن ميبقاش ليهم نصيب كبير فى التعليم والثقافة لكن الحياة كان علمها متفوق على التعليم ذاته
اهالينا اتعلمنا منهم ان الطباع الاصيلة فى اى انسان مش حتتغير حتى مع طلوع الروح وان مهما حاولنا نغير طباع انسان يبقى بنحرق اعصابنا وبنضيع عمرنا على الفاضى …
وان الاصل غلاب ومعاشرة الاصيل الهين السهل الحنين دة رزق واكبر انتصار فى الحياة اكتر من رزق المال ..
يبقا لما حد يقولك / عيش عيشة أهلك
ابتسم وقوله / ياريتها دااااااااااااااااامت
